آپ نے اکثر یہ نوٹ کیا ہوگا کہ دن کے کسی وقت آپ کا موڈ بہت اچھا ہوتا ہے اور آپ ہر بات میں مثبت پہلو تلاش کرتے ہیں  جبکہ اسی دن میں کوئی لمحہ ایسا بھی ہوتا ہے جو آپ کے مزاج پر گراں گزرتا ہے تاہم سائنسدانوں نے اب اس کی وجہ دریافت کر لی ہے۔

یونیورسٹی آف مشی گن اور ڈارٹ ماؤتھ ہیلتھ کے تحت کی جانے والی ایک تحقیق کے مطابق طلوع فجر سے عین پہلے رات کا وقت ایک ایسا لمحہ ہوتا ہے جو مزاج پر گراں گزرتا ہے سائنسدانوں نے دریافت کیا ہے کہ موڈ، سرکیڈین کلاک، اور دیگر عوامل کی بنیاد پر صبح 5 بجے  دن کا بدترین وقت ہوتا ہے۔

محققین کے مطابق دن کے آغاز سے قبل یہ ساٹھ منٹ ایسے ہیں جس میں لوگوں کی بڑی تعداد کم ترین موڈ کی اطلاع دیتی ہے قطع نظر اس کے وہ کب بیدار ہوئے ہیں۔ جبکہ تحقیق کے مطابق شام 5 بجے کا وقت اس کے برعکس نتائج پیش کرتا ہے جس میں لوگوں کی اکثریت سب سے زیادہ خوش مطمئین ہوتی ہے۔

بینجمن شاپیرو، جو کہ اس تحقیق کے مرکزی مصنف  اور ڈارٹ ماؤتھ ہیلتھ کے ماہر نفسیات ہیں وہ اور ان کی ٹیم نے دو سالوں کے دوران تقریباً 2,602 میڈیکل انٹرنز کے فٹ بٹ ڈیٹا کا تجزیہ کرکے یہ نتائج اخذ کیے۔جس میں انہوں نے ہیلتھ ٹریکنگ ڈیوائس کو شرکاء کے دل کی مسلسل دھڑکن، قدموں کی گنتی، نیند کے اعداد و شمار اور روزانہ موڈ کے اسکور کا اندازہ لگانے کے لیے استعمال کیا۔

محققین کے مطابق مذکورہ بالا وقت اور مزاج کے درمیان باہمی تعلق پایا جاتا ہے  شرکاء کا مزاج جتنی دیر وہ جاگتے رہیں گے خراب رہے گا۔ نیند کی کمی ایک ایسا محرک ہے جو کسی کے بھی مزاج کو خراب کرسکتا ہے لہذا کوئی بھی شخص جو پوری رات صبح 5 بجے تک جاگتا ہے اس کا مزاج اس سے بھی زیادہ خراب ہونا چاہئے جو صبح 5 بجے بیدار ہو۔

محققین نے نوٹ کیا کہ کئی شرکاء دن میں 18 گھنٹے سے زیادہ جاگتے ہیں اسی لیے ضروری ہے کہ رات کی پرسکون نیند کو یقینی بنایا جائے تاکہ مزاج کی اس خرابی سے بچا جاسکے ۔