کافی دنیا بھر کا مرغوب مشروب ہے اور اب اس میں ایک قدرتی مالیکیول (سالمہ) دریافت ہوا ہے جو عمررسیدہ افراد کے پٹھوں کے افعال کو بہتر بناسکتا ہے۔

اگرچہ یہ تحقیق ایک کافی ساز ادارے نے کی ہے لیکن اس تحقیق میں سنجیدہ سائنسی ادارے بھی شامل ہیں۔ ان میں نیشنل یونیورسٹی آف سنگاپور اور دیگر تحقیقی لیبارٹریاں پیش پیش ہیں۔ اس کے علاوہ جامعہ تہران، جامعہ ساؤتھ ایمپٹن، جامعہ الابامہ، اور دیگر ادارے بھی شامل ہیں۔

ان کی تحقیق کے مطابق کافی میں ‘ٹرائیگونیلائن’ نامی ایک مرکب  دیکھا گیا ہے جو پٹھوں کو بالخصوص بڑھاپے میں مضبوط بنانے کی صلاحیت رکھتا ہے۔ ماہرین کے مطابق یہ ایک قدرتی جسمانی عمل سارکوپینیا کی رفتار کم کرتا ہے۔ واضح رہے کہ سارکوپینیا ایک ایسی کیفیت ہے جس میں بڑھاپے کے ساتھ ساتھ پٹھے اور عضلات کمزور ہوتے جاتے ہیں۔ پھر بوڑھے افراد سہاروں کے محتاج ہوجاتے ہیں۔

سارکوپینیا میں خلوی توانائی کے مرکز مائٹوکونڈریا بھی کم توانائی خارج کرتے ہیں۔ اب اس مقام پر کافی کا مرکب انہیں ایسا کرنے سے روکتا ہے اور یوں عضلات اور پٹھے کمزور ہونے کی رفتار کو مکمل ختم تو نہیں لیکن کم ضرور کیا جاسکتا ہے۔

تاہم اس پر مزید تحقیق کی ضرورت ہے لیکن کافی کے دیگر بہت سے فوائد ایسے ہیں کہ اسے غذا میں شامل رہنا چاہیے ۔