کیا آپ نے کبھی غور کیا ہے کہ ایک نیا اور اچھی کمپنی کا بلینڈر خریدنے پر بھی وہ کچھ ہی عرصے میں یا تو خراب ہوجاتا ہے یا ٹھیک طرح سے کام نہیں کرتا اس کی وجہ وہ غذائیں ہیں جو بلیڈ اور مشینری کو نقصان پہنچاتی ہیں۔

لوگوں کی اکثریت کا خیال ہے کہ بلینڈر میں ہر چیز کو بلینڈ کیا جاسکتا ہے تاہم ایسا نہیں ہے ہر مشین کی الگ الگ خصوصیات ہوتی ہیں اور اسے اسی کے مطابق استعمال کیا جانا ضروری ہے۔ یہاں پر ان 5 غذاؤں کے بارے میں بتایا جارہا ہے جو بلینڈر کو خراب کر سکتی ہیں۔

گرم لیکویڈ یا کھانا

اکثر لوگ سوپ تیار کرتے ہیں اور اس میں موجود اجزاء کو یکجا کرنے کے لیے بلینڈ کا استعمال کرتے ہیں تاہم گرم سوپ یا اسی طرح کی کوئی بھی گرم غذا بلینڈر میں ڈالنے سے گریز کریں۔ بہت زیادہ گرم اجزاء کو بلینڈر میں ڈالنے سے اس کی مشین حدت کی وجہ سے خراب ہوسکتی ہے۔ کوشش کریں سوپ یا کسی بھی غذا کو بلینڈ کرنے کے لیے پہلے کمرے کے درجہ حرارت پر ٹھنڈا کریں پھر بلینڈر استعمال کریں۔

کافی بین

آپ تکنیکی طور پر بلینڈر کو کافی گرائنڈر کے طور پر استعمال کر سکتے ہیں، لیکن یہ کوئی دانشمندانہ انتخاب نہیں ہے۔ اس کی وجہ یہ ہے کہ، کافی بین کافی سخت ہوتے ہیں اور وقت گزرنے کے ساتھ یہ بلینڈر کے بلیڈ کی دھار کو خراب کر سکتے ہیں جس کے نتیجے میں کسی بھی چیز کو بہتر طریقے سے پسا نہیں جاسکےگا۔

برف

برف کا شمار بھی کافی بین کی طرح سخت چیز میں کیاجاتا ہے یہی وجہ ہے کہ برف کو بلینڈر میں نہیں ڈالنا چاہیے کیونکہ اس سے آلات کو نقصان پہنچ سکتا ہے، بلیڈ کی دھار خراب ہوسکتی ہے۔ اگر کبھی برف کو اسمودی یا کسی مشروب کے ساتھ ڈالنا مقصود بھی ہوتا کوشش کریں کہ اس کے چھوٹے آئس کیوب ڈالیں تاکہ بلیڈ پر اضافی بوجھ نہ پڑے۔

خشک میوہ جات

یہ بات تو سب ہی جانتے ہیں کہ خشک میوہ جات میں آئل ہوتا ہے جب اسے بلینڈر میں کسی چیز کے ساتھ یا ملے جلے گریوں کو بلینڈ کیا جاتا ہے تو گاڑھی چپچپی سی ایک تہہ بن جاتی ہے جس سے بلینڈر کی بلیڈ جام ہوجاتی ہے جو کہ اس مشین کی خرابی کا باعث بن سکتی ہے۔

آلو

یہ بات جان کر آپ ضرور حیران ہوں گی آلو بھی بلینڈر کو خراب کرسکتا ہے اس کی وجہ یہ ہے کہ پکے ہوئے آلو میں نشاستہ ہوتا ہے جو بلینڈر کو چپچپا بنا سکتا ہے، اس لیے کوشش کریں کہ آلو کے لیے ہمیشہ رائسر یا میشر استعمال کریں ۔