موسم کوئی بھی ہو بالوں میں خشکی اکثر بالوں کے جھڑنے کا سبب بنتی ہے تاہم سرد موسم میں یہ مسئلہ اور بھی بڑھ جاتا ہے اس مقصد کے لیے بازار میں مختلف اقسام کے تیل اور شیمپو دستیاب ہیں جو سر سے خشکی کے مکمل خاتمے کا دعویٰ کرتے ہیں تاہم یہ اتنے کار آمد ثابت نہیں ہوتے۔

 اگر آپ کا شمار بھی ایسے افراد میں ہوتا ہے جو بالوں کی خشکی سے پریشان ہیں اورتمام کار آمد حربے آزماچکے ہیں تو حاضر ہے ایک ایسا جادوئی نسخہ جو خشکی کو جڑ سے اکھاڑ پھینکتا ہے۔ اسے بنانا بہت آسان ہے اور لگانا بھی بہت آسان ہے۔ سب سے اہم بات یہ ہے کہ جو خواتین ہزاروں روپے کے میڈیکیٹڈ شیمپو آزماچکی ہے وہ چند روپوں والا یہ ٹوٹکا ضرور آزماکردیکھیں۔

تاہم اس نسخے کو آزمانے سے قبل یہ بات ذہن نشین کر لیں کہ جن خواتین کی جلد حساس ہے وہ یہ نسخہ استعمال نہ کریں یا استعمال سے قبل اپنے معالج  سے ضرور مشورہ کریں۔ اسی طرح اگر سر پر کوئی زخم یا خراش ہے تب بھی یہ نسخہ استعمال نہ کریں۔

نسخہ تیار کرنے کا طریقہ

ایک چھوٹی شیشے کی بوتل میں سرسوں کا تیل بھرلیں۔ اب کسی پنساری کی دکان سے دس روپے کی گندھک منگوالیں۔ پیلے رنگ کی گندھک ڈلوں کی صورت میں ملتی ہے۔ اب اس گندھک کو جہاں تک ممکن ہو باریک سے باریک کوٹ لیں۔ اس کے بعد گندھک کو تیل کی بوتل میں ڈال کر اچھی طرح ہلائیں۔

استعمال کا طریقہ

رات سونے سے قبل اس تیل کی بوتل کو اچھی ہلا ئیں اور اس تیل کو سر کی جڑوں میں لگائیں تاکہ گندھک کے ذرات سر کی جلد تک پہنچ جائیں پھر سر پر کوئی کیپ پہن کر سوجائیں اور صبح اٹھ کر بالوں کو صابن یا شیمپو سے دھولیں۔ بہتر نتائج کے لیے اس عمل کو لگاتار تین دن تک دہرائیں چوتھے دن خشکی سے نجات مل جائے گی۔