دنیا بھر میں مرد ہو یا خواتین رات سو نے سے قبل کچھ معمول کے کام ضرور انجام دیتے ہیں جیسے دانت صاف کرنا  لیکن کیا آپ جانتے ہیں کہ روزانہ رات سونے سے قبل چہرہ دھونا بھی کتنا ضروری ہے۔

سونے سے قبل چہرہ دھونا صرف دن بھر کی گردوغبار اور میک اپ صاف کرنے اور عمر بڑھنے کے ساتھ جلد پر پڑنے والی جھریوں کی روک تھام کے لیے ہی ضروری نہیں ہے بلکہ اس کی افادیت اس سے کہیں بڑھ کر ہے۔

اس حوالے سے دو مشہور ماہرین جلد نے اپنی انفردای رائے کا اظہار کیا جو  یہاں پر پیش کی جارہی ہیں۔

سب سے پہلے بات کر لیتے ہیں این چاپاس کی رائے کی جو کہ نیو یارک میں یونین ڈرم کی بانی اور ماہر ڈرمیٹولوجسٹ ہیں ان کے مطابق دن بھر چہرے کی جلد ماحول کی آلودگی، گرغبار اور مختلف بیکٹیریا کا سامان کرتی ہے جبکہ سونے سے قبل چہرہ دھونے سے ان سب سے نجات مل جاتی ہے اگر اسے صاف نہ کیا جائے تو یہ گرد وغبار جلد کے مسامات کو بند کرنے کا سبب بنتا ہے۔ ساتھ ہی انہوں نے یہ بھی کہا کہ جلد جب صاف ہوتی ہے تو بہتر انداز میں سانس لیتی ہے اورجلد کے نئے خلیات جنم لیتے ہیں اس طرح نیند کے دوران قدرتی تخلیق نو کا عمل آسان ہوجاتاہے۔

رات میں چہرہ دھونا جلد کی صحت کو بڑھا کر رنگت بھی نکھارتا ہے، بہت سے لوگ جو رات میں چہرے کی دیکھ بھال کے لیے مصنوعات استعمال کرتے ہیں صاف چہرے پر جب انہیں استعمال کیا جاتا ہے تو ان کی افادیت اور تاثیر کئی گنا بڑھ جاتی ہے۔

ویسے تو ہر ایک شخص کو رات سونے سے قبل چہرہ دھونا ضروری ہے تاہم خواتین کے لیے یہ اور بھی اہم ہے کیونکہ خواتین دن بھر میں کئی طرح کا میک اپ استعمال کرتی ہیں۔

چہرے کی صفائی کیسے کی جائے اس حوالے ایک اور ماہر ڈرمیٹولوجسٹ لارین فائن جن کا تعلق شکاگو، الینوائے سے ہے کا کہنا ہے کہ چہرہ دھونے کا قطعاً یہ مطلب نہیں ہے کہ آپ بہت مہنگی اور کیمیکلز سے بھرپور مصنوعات کا استعمال کریں۔ تاہم ایک اچھا فیشل کلینزر اور موئسچرائزرز ضرور ہونا چاہئے۔ کوشش کریں جو بھی کلینزر استعمال کریں ان میں سخت کیمیکلز نہ ہو۔

انہوں نے اس بات پر بھی زور دیا کہ جلد کی دیکھ بھال کی بہت ساری مصنوعات کے استعمال سے گریز کیا جائے۔

کلینزر کو’’اسکربنگ‘‘ ذرات سے پاک ہونا چاہئے کیونکہ اس طرح یہ کلینزر کے بجائے کواسکربنگ کا کام انجام دے گا جو کہ چکنی جلد پر نقصان کا باعث بن سکتا ہے۔

اسی لیے وہ نرم ہاتھوں سے اسکرب کا استعمال کیے بغیر ایکسفولیئٹ کرنے کا مشورہ دیتی ہیں۔ جبکہ چہرے کو زیادہ دھونا بھی نقصان کا باعث بن سکتا ہے اس کی وجہ یہ ہے کہ جلد پر تیل سے بنی ایک قدرتی حفاظتی رکاوٹ ہوتی ہے، جسے لپڈ بیریئر کہا جاتا ہے، یہی وجہ ہے کہ چہرے کو کثرت سے دھونا یا سخت کلینزر کا استعمال کرنا جلد کے قدرتی حفاظتی تہہ کو نقصان پہنچاتا ہے جس سے جلد کی خشکی بڑھتی ہے اس خشکی کو کم کرنے کے لیے جلد مزید حفاظتی تیل کا اخراج کرتی ہے جو جلد پر جلن کا باعث بنتی ہے۔

چہرہ دھونے کے بعد کوشش کریں کہ کسی اچھے  موئسچرائزر کا استعمال ضرور کریں تاکہ جلد کی نمی کو برقرار رکھا جاسکے ۔