پاکستان سمیت دنیا بھر میں آٹزم سے آگاہی کا دن آج منایا جارہا ہے۔

آٹزم ایسا ذہنی عارضہ ہے جس میں کسی شخص کو گفتگو، میل جول، سمجھ بوجھ اور حواس کو قابو میں رکھنے میں مشکلات پیش آتی ہے۔

آٹزم کا شکار ہربچہ دوسرے سے مختلف ہوتا ہے اور اس کی علامات بھی دوسرے آٹسٹک بچے سے مختلف ہوتی ہیں۔

بروقت توجہ اور تربیت کی مدد سے انہیں معاشرے کا کار آمد فرد بنایاجاسکتا ہے۔

بچوں کی ذہنی بیماری سے متعلق عالمی دن ’’آٹزم ڈے‘‘ 2 اپریل کو پاکستان سمیت دنیا بھر میں منایا جارہا ہے۔

اس دن کو منانے کا مقصد عالمی سطح پر عوام کو بچوں کی ذہنی نشوونما کے بارے میں بیماری کے بارے میں آگاہی فراہم کرتا ہے۔

اس دن کی مناسبت سے دنیا بھر کے تعلیمی اداروں کے پروگراموں میں اساتذہ، طلبہ اور والدین حصہ لیں گے۔

اس بیماری میں مبتلا لوگ خیالی دنیا میں رہتے ہیں، بول چال میں دقت محسوس کرتے ہیں اوراپنے خیالات کو بیان نہیں کر سکتے۔

ماہرین کا کہنا ہے کہ ایک صحت مند بچہ 3برس کی عمر کے بعد اپنے ماں باپ سمیت قریبی لوگوں سے سماجی بندھن باندھنے کا اہل ہوجاتاہے لیکن آٹزم میں مبتلا بچہ ایسا کرنے میں ناکام رہتاہے، وہ اپنی خیالی دنیا میں گم ہو کے رہ جاتاہے اوراسے بیرونی دنیا سے کوئی سروکار نہیں ہوتا۔

بدقسمتی سے ابھی تک آٹزم کا کوئی علاج دریافت نہیں ہوسکا ہے تاہم ماہر نفسیات ، اساتذہ ، والدین اور دوسرے رشتے دار متاثرہ بچے کی مدد کرسکتے ہیں اور اس کی طرف مخصوص توجہ دے کر اسے سماجی زندگی کے دائرے کے اندر لانے میں اپنا کردار نبھا سکتے ہیں۔