دنیا میں ایسے افراد کی کمی نہیں ہے جنہیں رات میں اکثر نیند نہیں آتی یا دیر سے آتی ہے اور نیند کی کمی کئی جسمانی مسائل کا سبب بنتی ہے تاہم سو نے سے قبل چہل قدمی اس ضمن میں مفید ثابت ہوسکتی ہے۔

حال ہی کی جانے والی ایک تحقیق کے مطابق سونے سے قبل ہلکی سے اعتدال پسند جسمانی سرگرمیاں، جیسے چہل قدمی، نیند کے معیار کو بہتر بنا سکتی ہے خاص کر خواتین میں یہ زیادہ مفید ثابت ہوتی ہے۔

برینڈیز یونیورسٹی اور ایڈتھ نورس راجرز میموریل ویٹرنز اسپتال کی حالیہ تحقیق کے مطابق درمیانی سے بڑی عمر کے افراد میں جسمانی سرگرمی اور نیند کے معیار کے درمیان مثبت تعلق سامنے آیا ہے۔

اس تحقیق کے نتائج سے یہ بات سامنے آئی ہے کہ ایسے تمام افراد جو رات سونے سے قبل معمول سے زیادہ متحرک رہتے تھے انہوں نے بہتر ، معیاری اور طویل دورانئے کی نیند کی اطلاع دی۔ سونے سے قبل چہل قدمی نہ صرف نیند کے معیاراور دورانئے کو بہتر بناتی ہے بلکہ اس سے کئی جسمانی فائدے بھی حاصل ہوتے ہیں جویہاں پیش کیے جارہے ہیں۔

  بہتر نیند کا معیار

چہل قدمی یا ہلکی پھلکی ورزش کے بعد جسمانی درجہ حرارت میں قدرتی طور پر کمی واقع ہوتی ہے جس سے پر سکون نیند کا دورانیہ بڑھتا ہے اور یہی کمی پرسکون نیند کے لیے ضروری تصور کی جاتی ہے۔

 تناؤ میں کمی

شام کی چہل قدمی ایک تناؤ بھرے دن کے بعد دماغ  کو ہلکا پرسکون کرنے میں مدد دیتی ہے، یہ ایک طرح کے مراقبے کا کام کرتی ہے دماغ کو آرام دے کر تناؤ کے ہارمونز کو کم کرتی ہے۔

بہتر ہاضمہ

رات کے کھانے کے بعد ہلکی سی چہل قدمی ہاضمے اور میٹابولزم میں مدد کر سکتی ہے۔ یہ خون میں شکر کی سطح کو منظم کرنے میں بھی مددفراہم کرتی ہے، جو خاص طور پر ذیابیطس کے مریضوں یا انسولین کی حساسیت والے لوگوں کے لیے فائدہ مند ہے۔

بہتر نیند کا دورانیہ

باقاعدگی سے چہل قدمی کرنا آپ کے قدرتی سونے اور جاگنے کے عمل کو تسلسل میں رکھتا ہے۔ جسے سرکیڈین تال بھی کہا جاتا ہے۔

ذہنی صحت میں اضافہ

چہل قدمی اینڈورفنز کے اخراج کو متحرک کرتی ہے، جو موڈ کو بہتر بنانے میں مدد دیتا ہے اور اضطراب اور افسردگی کی علامات کو کم کرتا ہے، جس سے رات میں بہتر نیند آتی ہے۔

اگرچہ سونے سے پہلے چہل قدمی کے بہت سے فوائد ہیں، تاہم نیند پر اس کے مثبت اثرات کو مزید بڑھانے کے لیے ان باتوں کے مد نظر رکھیں۔

سونے سے کم از کم 1.5 سے 2 گھنٹے پہلے چہل قدمی کریں، تاکہ ورزش کے بعد آپ کے جسم کا درجہ حرارت معمول پر آجائے۔

پرسکون اور محفوظ راستے کا انتخاب کریں۔ تاکہ پرسکون اور آرام دہ ماحول میں چہل قدمی کر سکیں۔

سونے سے قبل ہلکی سے اعتدال پسند چہل قدمی کریں اور شدید نوعیت کی ورزش سے گریز کریں کیونکہ یہ نیند میں تاخیر کا سبب بن سکتی ہے۔

سونے سے پہلے چہل قدمی کرنا آپ کے رات کے معمولات میں ایک فائدہ مند اضافہ ہے یہ نہ صرف نیند کے میعار کو بہتر بناتی ہے بلکہ آپ کو مجموعی صحت بھی اس سے بہتر رہتی ہے۔