ذیابیطس ایک دائمی مرض ہے جو اس وقت جنم لیتا ہے جب جسم خون میں شکر کی سطح کو مؤثر طریقے سے منظم نہیں کرپاتا، اس طرح غذا میں موجود چینی گلوکوز میں تبدیل ہوئے بغیر خون میں شامل ہوجاتی جس سے صحت کے کئی مسائل جنم لینے لگتے ہیں، تاہم دارچینی اس مرض کو کم کرنے میں مفید ثابت ہوسکتی ہے۔

حال ہی میں کی جانے والی ایک تحقیق کے مطابق دارچینی خون میں شکر کی سطح کو کم کر سکتی ہے، لوگوں کو وزن کم کرنے اور ذیابیطس سے لڑنے میں مدد دیتی ہے۔

ایک ایسی دنیا میں جہاں ورزش کا فقدان ہے، اور خوراک بھی ناقص ہے، ذیابیطس ایک سنگین مسئلہ بنتا جا رہا ہے۔ امپیریل کالج لندن کی ایک چھوٹی سی تحقیق کے مطابق ذیابیطس میں مبتلا بچوں کی تعداد تقریباً دوگنی ہو گئی ہے جبکہ لوگوں کی بڑی تعداد اس کے حل کے لیے دار چینی کی طرف دیکھ رہی ہے۔

دار چینی مؤثر طریقے سے شوگر کو خون سے باہر لا کر چربی کے خلیوں سے پٹھوں کی طرف لے جاتی ہے جہاں انہیں ورزش کے ذریعے ختم کیا جاسکتا ہے۔

جب خون میں شکر کی سطح بڑھ جاتی ہے، تو آپ کا جسم ذخیرہ کرنے کے عمل کو متحرک کرنے کے لیے انسولین تیار کرتا ہے۔ تاہم، وقت کے ساتھ ساتھ انسولین کا ردعمل کم ہو جاتا ہے جس سے آپ کے خون میں شکر کی سطح کو کنٹرول کرنا مشکل ہو جاتا ہے۔

دار چینی کیسے کام کرتی ہے

مطالعے سے پتہ چلتا ہے کہ ذیابیطس سے پہلے کے مرحلے میں جسے پری ذیابیطس کہاجاتا ہے لوگوں کے لیے دار چینی کی اضافی خوراک کا 12 ہفتے کا کورس گلوکوز کی مزاحمت کو بہتر بنا سکتا ہے اور ذیابیطس بڑھنے کے عمل کو سست کر سکتا ہے۔

ایک اور تحقیق کے مطابق روزانہ ایک، تین یا چھ گرام دارچینی کا استعمال سیرم گلوکوز، ٹرائی گلیسرائیڈ، ایل ڈی ایل کولیسٹرول اور ٹائپ ٹو ذیابیطس والے افراد میں مجموعی کولیسٹرول کو کم کر سکتا ہے۔ اسی طرح ٹائپ 2 ذیابیطس کے مریضوں کی خوراک میں دار چینی کو شامل کرنا خطرے کے عوامل کو کم کر سکتا ہے۔ واضح رہے کہ دار چینی بالکل اسی طرح کام کرتی ہے جیسے ورزش۔

دار چینی لینے کا طریقہ

دارچینی کے بہت سے سپلیمنٹس بازار میں عام دستیاب ہیں۔ تاہم، بہترین نتائج کے لیے ضروری ہے کہ گھر میں موجود تازہ دارچینی استعمال کی جائے، روزانہ صبح اپنے ناشتے پر آدھا چائے کا چمچ پسی دارچینی چھڑک کر استعمال کریں یہ مقدار خون میں گلوکوز کی سطح پر نمایاں اثر ڈالنے کے لیے کافی ہے۔ تاہم، اس کے استعمال سے قبل اپنے معالج سے ضرور رابطہ کریں۔

ماضی میں کی جانے والی بہت سی تحقیق میں دار چینی اور صحت کے درمیان مثبت تعلق کی نشاندہی کی گئی ہے۔ تاہم، یہ کبھی بھی صحت مند غذا اور ورزش کے فوائد کی جگہ نہیں لے سکتی۔