یہ امید افزاء خبر طب کی دنیا سے آئی ہے جس کے مطابق صحت مند طرز زندگی حیات کو مختصر کرنے والے جین پر نہ صرف مثبت اثر ڈالتی ہے بلکہ یہ آپ کی عمر میں 5 برس تک اضافہ بھی کرتی ہے۔

واضح رہے کہ یہ اپنی نوعیت کا پہلا مطالعہ ہے جس میں یہ بات سامنے آئی ہے کہ صحت مند طرز زندگی کی پیروی آپ کی زندگی کو پانچ سال تک بڑھا سکتی ہے۔ محققین کے مطابق صحت مند طرز زندگی جس میں ورزش کرنا، صحت مند اور متوازن غذا کا استعمال،  کافی نیند لینا اور تمباکو نوشی نہ کرنا شامل ہیں، یہ حیات کو مختصر کرنے والے جین سے مرنے کے خطرے کو 62 فیصد تک کم کر سکتی ہے۔

محققین نے مزید یہ بھی کہا کہ جن لوگوں کے ڈی این اے کی بنیاد پر جلد مرنے کا امکان دیگر کی نسبت پانچ گنا زیادہ ہے وہ بھی ان امکانات کو کم کر سکتے ہیں۔

چین کی ژیجیانگ یونیورسٹی کے ڈاکٹر زیلونگ بیان کا کہنا ہے کہ ایسے افراد جن میں جینیاتی طور پر مرنے کا زیادہ خطرہ ہے وہ 40 برس کی عمر میں بھی صحت مند طرز زندگی کو اپنا کر اپنی عمر میں تقریباً 5.22 برس کا اضافہ کر سکتے ہیں۔

طویل زندگی کے لیے ایک بہترین طرز زندگی کا جو مجموعہ ہے اس میں تمباکو نوشی نہ کرنا، باقاعدہ جسمانی سرگرمیاں انجام دینا، مناسب نیند کا دورانیہ، اور صحت مند غذا شامل ہے۔

سابقہ تحقیق کے مطابق صحت مند طرز زندگی جیسے لمبے دورانیے کی ورزش، نیند اور صحت بخش خوراک کا استعمال جبکہ الکحل، سگریٹ اور غیر صحت بخش غذاؤں سے پرہیز، لمبی عمر کو بہتر بنانے میں مدد دیتی ہے۔ جبکہ یہ بات اپنی جگہ ثابت ہوچکی ہے کہ کچھ لوگوں میں جنیاتی طور جلد مرنے کا زیادہ خطرہ موجود ہوتا ہے۔

تاہم اس نئی تحقیق میں پہلی بار یہ دیکھا گیا ہے کہ طرز زندگی کے عوامل جینیاتی خطرے کو کس حد تک کم کر سکتے ہیں۔

اس تحقیق میں محققین نے یوکے بایو بینک کے 353,742 افراد کا 13 برس تک جائزہ لیا، اس دوران 24,239 اموات ہوئیں۔ نتائج کے مطابق ایسے تمام افراد جن میں جنیاتی طور مرنے کا زیادہ خطرہ ہوتا ہے ان میں کم جینیاتی خطرے والے افراد کے مقابلے میں جلد موت کا خطرہ 21 فیصد زیادہ ہوتا ہے، چاہے ان کا طرز زندگی کچھ بھی ہو۔

دریں اثنا، غیر صحت مند طرز زندگی کے حامل افراد کے جینیاتی خطرے سے قطع نظر، جلد موت کے امکانات 78 فیصد بڑھ جاتے ہیں۔ غیر صحت مند طرز زندگی اور کم عمر والے جین دونوں طویل عمر والے جینز اور صحت مند طرز زندگی والے لوگوں کے مقابلے میں جلد موت کے خطرے کو دوگنا سے بھی زیادہ کر دیتے ہیں۔

یہ نئی تحقیق ظاہر کرتی ہے کہ جینیاتی عوامل کے باوجود، متوازن غذائیت سے بھرپور خوراک کھانے اور فعال رہنے سمیت صحت مند طرز زندگی اپنانا، طویل عرصے تک زندہ رہنے میں مدد دے سکتا ہے۔ اور یہ آپ کی زندگی میں پانچ برس سے زیادہ کا اضافہ کر سکتا ہے۔