عراق اور آسٹریلیا کے محققین کا کہنا ہے کہ انہوں نے ایک  ایسا کمپیوٹر الگورتھم تیار کیا ہے جو کسی شخص کی زبان کے رنگ کا تجزیہ کر کے 98 فیصد دستگی کے ساتھ اس کی طبی حالت کا حقیقی وقت میں پتہ لگا سکتا ہے۔

عام طور پر، ذیابیطس میں مبتلا افراد کی زبان کی رنگت پیلی ہوتی ہے، جبکہ کینسر کے مریضوں کی زبان کی رنگت جامنی، جس پر چکنائی کی ایک موٹی تہہ ہوتی ہے، اسی طرح شدید فالج کے مریض کی زبان غیر معمولی شکل کے ساتھ رنگت میں سرخ ہوتی ہے۔

اس تحقیق کے سینئر مصنف علی النجی جو کہ بغداد کی مڈل ٹیکنیکل یونیورسٹی اور یونیورسٹی آف ساؤتھ آسٹریلیا میں تدریس کے فرائض انجام دیتے ہیں کا کہنا ہے کہ سفید زبان خون کی کمی کی نشاندہی کر سکتی ہے، جبکہ کوووڈ 19 کے سنگین معاملات میں زبان گہری سرخ ہونے کا امکان ہے، اس طرح  بنفشی رنگ کی زبان معدے کے مسائل یا دمہ کی نشاندہی کرتی ہے۔

النجی نے کہا کہ ان کا مجوزہ امیجنگ سسٹم بیماری کی علامات کے لیے زبان کا معائنہ کرنے کے لیے روایتی چینی طب  کا طریقہ کار استعمال کرتا ہے۔

مصنوعی ذہانت کے اس ماڈل کی تیاری کے لیے زبان کے رنگ اور بیماری کی شناخت کے لیے 5,200 سے زیادہ تصاویر کا ڈیٹا استعمال کیا گیا۔

محققین نے مشرق وسطیٰ کے دو تدریسی ہسپتالوں سے زبان کی 60 تصاویر کے ساتھ اس ماڈل کا تجربہ کیا۔

اس تحقیق میں مریض کو ایک ویب کیم سے لیس لیپ ٹاپ سے تقریباً 8 انچ کے فاصلے پربٹھایا گیا تھا، جس نے ان کی زبان کی تصویر لی تھی یہ ماڈل تقریبا تمام معاملات میں بیماری کا تعین کرنے کے قابل تھا۔

مطالعہ کے شریک مصنف جاوان چاہل، یونیورسٹی آف ساؤتھ آسٹریلیا کے پروفیسر کا کہنا ہے کہ اس ٹیکنالوجی کو اسمارٹ فون ایپ سے استعمال کیا جا سکے گا اس طرح یہ ایپ ذیابیطس، فالج، خون کی کمی، دمہ، جگر،  کوووڈ 19 اور دیگر حالات کی تشخیص کرسکے گی۔

یہ نتائج اس بات کی تصدیق کرتے ہیں کہ کمپیوٹرائزڈ زبان کا تجزیہ بیماریوں کی اسکریننگ کے لیے ایک محفوظ، موثر، صارف دوست اور سستا طریقہ ہے جو کہ صدیوں پرانی مشق کو جدید طریقوں میں ڈھال کر استعمال کرتا ہے۔

تاہم ابھی بھی اس ضمن میں کچھ رکاوٹیں حائل ہیں جن پر قابو پانا ہے، تاہم، یہ ٹیکنالوجی بیماریوں کی تشخیص اور علاج کے لیے ایک گیم چینجر ثابت ہوگی۔