نیب کی جانب سے پیپلزپارٹی کے مرکزی رہنما سید خورشید شاہ کے خلاف انکوائری تیز کردی گئی ہے۔

تفصیلات کے مطابق نیب سکھر نے دادو۔سکھر،شکارپور،خیرپوراورگھوٹکی ضلع کے ڈپٹی کمشنرز کو لیٹرجاری کرتے ہوئےخورشید شاہ کے اثاثوں کی تفصیلات طلب کر لی گئیں۔

پیپلز پارٹی کے مرکزی رہنماخورشید شاہ کے خلاف ہونے والی انکوائری  کے لیئے لکھے گئے خطوط میں  خورشید احمد  شاہ کی دونوں بیگمات اور بچوں کی جائیدادیں، گھراور بینک بیلنس سے متعلق رپورٹ نیب میں دو ستمبر تک درج کروانے کے احکامات دیئے گئے ہیں۔

نیب لیٹر میں خورشید شاہ کے بیٹے اور رُکن صوبائی اسمبلی سید فرخ شاہ سمیت ان کی بیٹوں کے نام اوردونوں بیگمات بی بی طلعت، بی بی گل ناز کے نام بھی بھی شامل ہیں۔

جبکہ نیب کی جانب سے جاری کردہ لیٹر میں وزیر ٹرانسپورٹ سندھ سید اویس قادر شاہ کا نام بھی موجود ہے۔

واضح رہے اس سے قبل بھی قومی احتساب بیورونے پیپلز پارٹی کے مرکزی رہنما اور سابق اپوزیشن لیڈرسید خورشیداحمد شاہ کے خلاف انکوائری کی منظوری دے دی تھی۔ چیئرمین نیب نے اجلاس سے خطاب میں کہا تھا کہ نیب کا مقصد کرپشن فری پاکستان ہے ۔نیب نے خورشید احمد شاہ کے ساتھ مسلم لیگ ن کے رہنما سردار مہتاب عباسی کے خلاف بھی انکوائری کی منظوری دی گئی تھی۔

خیال رہے کہ سابق اپوزیشن لیڈر خورشید شاہ کیخلاف اثاثہ جات چھپانے کی درخواست سندھ ہائی کورٹ کے سکھر بینچ کے سامنے زیر سماعت ہے۔پاکستان تحریک انصاف (پی ٹی آئی) رہنما طاہر شاہ نے خورشید شاہ کی الیکشن 2018میں کامیابی کے خلاف درخواست دائر کر رکھی ہے۔