صدرمملکت ڈاکٹرعارف علوی نے کہا ہے کہ ترک حکومت کا مسئلہ کشمیر پرحمایت اور تعاون پر شکر گزار ہوں۔

تفصیلات کے مطابق اسلام آباد میں صدر ڈاکٹرعارف علوی نے ترک میڈیا وفد سے ملاقات کی ، ملاقات میں صدر مملکت ڈاکٹر عارف علوی نے کہا کہ بھارت میں اقلیتیں غیرمحفوظ ہیں،بھارتی قیادت علاقائی اور عالمی امن بلکہ بھارت کی سماجی اقدار کیلیے بھی خطرہ ہے ۔

ترک میڈیا کے وفد سے ملاقات میں ڈاکٹرعارف علوی کا کہنا تھا کہ جنگی جنون میں مبتلا بھارتی لیڈر شپ  ہندوتوا کو عام کررہی ہے، بھارت فلسطین کی طرح کشمیرمیں ظلم کررہا ہے۔

ڈاکٹرعارف علوی کا یہ بھی کہنا تھا کہ لوگوں کی امنگوں کوطاقت کے زورپرنہیں دبایا جاسکتا،بھارت کشمیریوں کی جدوجہد آزادی کودبانے میں ناکام رہےگا۔

صدر مملکت نے کہا کہ پاکستان امن کاخواہاں ہے، اگرجنگ مسلط کی گئی تو پوری طاقت سے جواب دینگے۔

ڈاکٹرعارف علوی نے یہ بھی کہا کہ پاکستان ترکی کے مفاد میں تمام امور پر ترک عوام اور حکومت کی حمایت جاری رکھے گا۔

صدر مملکت ڈاکٹر عارف علوی کا مزید کہنا تھا کہ بھارت کا 5اگست کااقدام غیرقانونی اورعالمی قوانین کی خلاف ورزی ہے، عالمی برادری بھارت پرمقبوضہ کشمیر پرانسانی حقوق کی بحالی پرزوردے۔

واضح رہے اس سے قبل صدر مملکت ڈاکٹر عارف علوی نے اپنے ایک بیان میں کہا تھا کہ بھارت ایک غیر ذمہ دارایٹمی ملک ہے۔

صدر مملکت ڈاکٹرعارف علوی نے یہ بھی کہا تھا کہ مسئلہ کشمیر سنگین نوعیت اختیار کرچکا ہے، تنازع کے حل کی طرف جانا ہوگا، عالمی برادری نے اپنی ذمہ داری پوری نہیں کی، مودی نے بھارت میں نسل پرستی کی آگ خود لگائی ہوئی ہے۔

صدر مملکت نے مطالبہ کیا تھا کہ اقوام متحدہ مقبوضہ کشمیر میں تحقیقاتی کمیشن بھیجے، اقوام متحدہ کے فوجی مبصر گروپ کو مقبوضہ کشمیر میں رسائی دی جائے، انہوں نے اپیل کی کہ ہر شخص موبائل فون کے ذریعے بھارتی مظالم دنیا تک پہنچائے۔