مسلم لیگ ن رہنمااحسن اقبال نے کہا ہے کہ حکومت نے چیف الیکشن کمشنر کے خلاف ریفرنس بھیج کر اپنے فاشسٹ چہرے سے ایک اور پردہ اتار دیا ہے۔

تفصیلات کے مطابق پارلیمنٹ کے مشترکہ اجلاس سے خطاب کے بعد میڈیا سے گفتگو کرتے ہوئے مسلم لیگ نون کے رہنما احسن اقبال نے کہا کہ پارلیمنٹ میں اتفاق رائے کی ضرورت تھی، جو حکومتی ہٹ دھرمی کے باعث پیدا نہ ہوسکی۔

احسن اقبال کا کہنا تھا کہ حکومت نے ججز کے بعد چیف الیکشن کمشنر کے خلاف بھی ریفرنس بھیج دیا ہے،آخری وقت میں اسپیکر کو مجبورکیا گیا کہ اسیرانِ جمہوریت کے پروڈکشن آرڈر کو واپس لیں،جس سے اجلاس کا ماحول خراب ہوا

مسلم لیگ نون کے رہنما احسن اقبال کا مزید کہنا تھا کہ مِسنگ ممبران کے بغیر ایوان کو مکمل نہیں سمجھتے، لیڈر آف اپوزیشن کو معاملات پر بات کرنے کا موقع نہیں دیا گیا ۔

اس موقع پرامیر جماعت اسلامی سراج الحق کا کہنا تھا کہ ایک سالہ حکومتی کارکردگی پر صدر مملکت کا تبصرہ یکطرفہ تھا۔

جبکہ جمعیت علماء اسلام کے مولانا اسد محمود نے کہا کہ اکتوبر چور دروازے سے آنے والی حکومت سے آزادی کا مہینہ ہو

پیپلز پارٹی کے رہنما راجہ پرویز اشرف نے اپنے بیان میں کہا کہ اسپیکر سے باضابطہ اجازت لے کر آئینی معاملات پر بات کرنے کی درخواست کی۔

سابق وزیرِ اعظم راجہ پرویز اشرف نے یہ بھی کہا کہ صدر پاکستان پارٹی کا نہیں پورے ملک کا اور فیڈریشن کا صدر ہوتا ہے۔

واضح رہے کہ اپوزیشن کےاجلاس میں اپوزیشن کی جانب سےگرفتار ارکان کی نشستوں پر ان کی تصاویررکھی گئیں، صدرعارف علوی کے خطاب کے دوران اپوزیشن کا خاصا شور شرابہ کیا۔ اجلاس اپوزیشن کےشورشرابےکےباعث ملتوی کردیا گیا۔