وزیراعظم عمران خان پارٹی قائدین سے سخت ناراض، پارٹی میں دھڑے بازی پر آخری وارننگ دے دی۔

تفصیلات کے مطابق وزیراعظم عمران خان نے پارٹی میں دھڑےبازی پر سخت ایکشن لیتے ہوئےقائدین کوآخری وارننگ جاری کرتے ہوئے کہا ہے کہ پارٹی کی دھڑیاں بندیاں برداشت نہیں کی جائیں گی۔

ذرائع کے مطابق وزیراعظم نے شاہ محمود قریشی ،جہانگیر ترین ،سیف اللہ نیازی ، عامرکیانی،عبدالعلیم خان اورچوہدری سرور گروپ کو آپس میں معاملات سلجھانے کی ہدایت کی ہے۔

ذرائع کے مطابق گزشتہ رات گورنر پنجاب چوہدری سروراورجہانگیر ترین کی ملاقات بھی معاملات سلجھانے کی ایک کڑی ہے۔اس کےعلاوہ عامرکیانی کی بھی گورنرہاوس میں چوہدری سرورسے ملاقات ہوئی ہے۔

ذرائع کاکہناہےکہ چوہدری سرورکووزیراعظم نے دھڑے بندیاں ختم کرانے کا ٹاسک بھی دے دیاہے۔ ذرائع کاکہناہے کہ جلدجہانگیر ترین اور شاہ محمود قریشی میں بھی ملاقات متوقع ہے۔

دوسری جانب ذرائع کی جانب سے یہ خبر بھی سامنے آئی ہے کہ وزیراعظم عمران خان نے وفاقی کابینہ میں بڑی تبدیلیوں کا فیصلہ کرلیاہے۔وزیراعظم دورہ چین سے واپسی پر وہ اعلیٰ سطح کی مشاورت کے بعد کابینہ میں ردوبدل کریں گے۔

ذرائع کے مطابق وزارت داخلہ، وزارت پیٹرولیم، وزارت امورِ کشمیر، وزارت منصوبہ بندی، صنعت و پیداوار سمیت 9 وفاقی وزیروں کے قلمدان تبدیل ہونے کاامکان ظاہر کیاگیاہے۔

ذرائع کا کہنا ہے کہ وزیراعظم نے معاون خصوصی برائے اطلاعات و نشریات فردوس عاشق اعوان کو کام جاری رکھنے کی ہدایت کر دی ہے جبکہ وزیراعظم وزارتِ داخلہ کا قلم دان اپنے پاس بھی رکھ سکتے ہیں۔

خیال رہے کہ یہ امکان بھی ظاہرکیاگیاہے کہ وزیراعظم دورہ چین سے واپسی پرکابینہ میں 8 سے 10 وزراء کے قلمدان تبدیل کریں گے۔