امیر جماعت اسلامی سینیٹر سراج الحق نے کہا ہے کہ  لوڈشیڈنگ ، گندہ پانی ، پالوشن ، بے روزگاری اور بدامنی کراچی کی پہچان بن گئی ہے ۔

تفصیلات کے مطابق امیرجماعت اسلامی سینیٹرسراج الحق نے اپنے ایک بیان میں  کہا کہ وفاق، صوبے اور کراچی کی انتظامیہ کے آپس کے جھگڑوں نے شہر کو کچرہ کنڈی بنادیا ہے، وزیراعظم دورے اور اعلانات کرتے ہیں مگر  ان پر عملدرآمد نہیں ہوتا۔

امیر جماعت اسلامی نے کہا کہ  کراچی کی صنعت و تجارت کا پہیہ جام ہے اور سرمایہ کار اپنا کاروبار سمیٹ کر باہر منتقل ہورہے ہیں جبکہ کوڑے کے ڈھیروں پر آوارہ کتوں کا بسیرا کراچی کی انتظامیہ کا منہ چڑا رہاہے ۔

اپنے بیان میں امیر جماعت اسلامی سینیٹر سراج الحق کا کہنا تھا کہ ملک کا مسلسل دوسرا صدر کراچی سے تعلق رکھتا ہے، لیکن شہر کی حالت میں آج تک بہتری نہیں آئی ۔

سراج الحق کا خطاب، حکمرانوں پر کڑی تنقید

 سراج الحق کا کہنا تھا کہ تینوں حکمران پارٹیاں ایک دوسرے پر الزام لگاتی ہیں مگر اپنی ذمہ داری کا کسی کو احساس نہیں جبکہ تبدیلی سرکار نے کراچی کی حالت بدلنے ، دوبارہ روشنیوں کا شہر بنانے کے دعوے کیے تھے۔

امیر جماعت اسلامی کا یہ بھی کہنا تھا کہ بے روزگاری کے خاتمے جبکہ کراچی کی رونقیں بحال کرنے کے لیے دیانتدار اور خدمت خلق کے جذبے سے سرشار قیادت کی ضرورت ہے۔

سراج الحق  نے کہا کہ سندھ کی صوبائی حکومت بھی آئے روز عوام سے دعوے اور وعدے کرتی رہتی ہے جبکہ کراچی کی ضلعی حکومت اور انتظامیہ بھی کراچی کے شہریوں کو سہانے خواب دکھاتی ہے مگرشہر کی حالت پہلے سے بھی زیادہ ابتر ہورہی ہے۔

اپنے بیان میں امیر جماعت اسلامی سینیٹر سراج الحق نے مزید کہا کہ کراچی کی محرومیوں کا ایک ہی علاج ہے کہ عوام دوبارہ جماعت اسلامی کو خدمت کا موقع دیں۔