اسلام آباد ہائی کورٹ نےمنی لانڈرنگ کیس میں نامزدآصف علی زرداری کی ہمشیرہ فریال تالپور کی درخواست ضمانت منظور کرلی ہے۔

تفصیلات کے مطابق اسلام آباد ہائیکورٹ کے دو رکنی بینچ نے چیف جسٹس اطہر من اللہ کی سربراہی میں کیس کی سماعت کی جس میں عدالت نےفریال تالپور کوایک کروڑروپے کے مچلکوں کے عوض ضمانت منظور کرلی۔

نیب نے آصف علی زرداری کی ہمشیرہ  کی درخواست ضمانت کی مخالفت کی تھی۔

نیب نے تحریری جواب  عدالت کوپیش کرتے ہوئے مؤقف اپنایا تھا کہ فریال تالپور جعلی بینک اکاونٹس کیس کی نامزد ملزمہ اور مستفید ہونے والوں میں شامل ہیں۔

قومی احتساب بیورو نے مؤقف اپنایا کہ فریال تالپور کے خلاف ضمنی ریفرنس دائر کردیا ہے، ملزمہ جعلی اکاونٹس کیس کی اہم کمپنی زرداری گروپ کی سی ای او ہیں۔

کمرہ عدالت میں چیف جسٹس اطہر من اللہ نے استفسار کیاکہ ملزمہ کا اس کیس میں کردار کیا ہے؟ جس پر نیب پراسیکیوٹرکاہ کہناتھا کہ جعلی اکاؤنٹس سے شروع ہونے والی ٹرانزیکشن فریال تالپور کے اکاونٹ تک گئیں۔

نیب پراسیکیوٹرنے عدالت کوبتایا کہ ملزمہ نے ڈیڑھ کروڑ روپے کی رقم نکلوائی جوکہ ایک جعلی ٹرانزیکشن تھی۔

چیف جسٹس اطہر من اللہ نے استفسار کیا کہ کیا جس اکاونٹ میں رقم گئی وہ اکاونٹ فریال تالپور نے ڈیکلئیر کر رکھا ہے؟ اگر وہ اکاونٹ ڈیکلئیر کر دیا گیا تھا تو اسے جعلی اکاونٹ نہیں کہہ سکتے۔

نیب پراسیکیوٹرکاکہناتھاجس اکاونٹ سے رقوم گئیں وہ جعلی اکاونٹ ہے۔

نیب نےعدالت میں تحریری جواب جمع کرواتے ہوئے بتایا کہ فریال تالپور زرداری گروپ کے اکاونٹس کی دستخط کنندہ ہیں۔

یاد رہے کہ گزشتہ سماعت پرعدالت نےسابق صدر آصف علی زرداری کو طبی بنیادوں پر ضمانت دی تھی اور نیب نے فریال تالپور کی درخواست میں جواب جمع کرانے کے لیے مہلت طلب کی تھی۔

فریال تالپور نے منی لانڈرنگ کے کیس میں ضمانت کیلئے دائر درخواست میں مؤقف اپنایا کہ میں اسپیشل بچی کی والدہ ہوں، اس کی دیکھ بھال کے لیے ضمانت منظور کی جائے۔

نیب نے عبوری ضمانت مسترد ہونے پر آصف علی زرداری کو 10 جون اور فریال تالپور کو 14 جون 2019 کو حراست میں لیا تھا۔

ملزمہ پر بے نامی اکاؤنٹس کے ذریعے منی لانڈرنگ میں معاونت کا الزام ہے جب کہ آصف علی زرداری پر منی لانڈرنگ اور پارک لین کمپنی کے ذریعے قومی خزانے کو نقصان پہنچانے کا الزام ہے۔