وزیراعلیٰ پنجاب  سردار عثمان بزدار نے کہا  ہے کہ ترقیاتی منصوبوں کی لمبی فہرست ہے لیکن ہماری حکومت نے انتہائی مختصر عرصے میں فلاح عامہ کے بے شمار اقدامات کئے ہیں اور پسماندہ علاقوں کی ترقی کیلئے بے شمار منصوبے لے کر آئے ہیں۔

تفصیلات کے مطابق وزیراعلیٰ پنجاب سردار عثمان بزدار نے سرکٹ ہاؤس ڈی جی خان میں میڈیا سے گفتگو کرتے ہوئے کہا  کہ عام آدمی کے مسائل سمجھتا ہوں او رانہیں حل کرتا ہوں جبکہ ڈیرہ غازی خان میں شعبہ صحت کے حوالے سے 15ارب روپے کے منصوبوں پر کام جاری ہے۔

سردار عثمان بزدارنے کہا کہ ایک برس میں صوبے میں 9نئے ہسپتال شروع کئے ہیں، ہسپتالوں میں 9ہزار بستروں کا اضافہ کررہے ہیں جبکہ شعبہ صحت کے بجٹ میں 27فیصد اضافہ کیاگیاہے۔

اس موقع پر وزیراعلیٰ  پنجاب نے  صحافیوں کے لئے صحت انصاف کارڈ کے اجراء کا اعلان کرتے ہوئے کہا کہ صحافیوں کو بھی صحت کارڈ کی سہولت میں شامل کیاجائے گا۔

تحریک انصاف کے عہدیدار اور کارکن ہمارے سر کا تاج ہیں، عثمان بزدار

 وزیراعلیٰ پنجاب سردار عثمان بزدار نے ہر ڈویژن میں صحافی کالونی کے قیام کا اعلان کرتے ہوئے کہا کہ آج ڈیرہ غازی خان کے صحافیوں کے لئے کالونی کا اعلان کرتا ہوں اسلئے کمشنر ڈیرہ غازی خان صحافی کالونی کے لئے اراضی کی نشاندہی کا کام جلد کریں  کیونکہ اصولی فیصلہ کیاہے کہ پنجاب کے ہر ڈویژن میں صحافیوں کے لئے کالونی بنائی جائے گی ۔

واضح رہے کہ اس سے قبل بھی نوزیراعلیٰ پنجاب سردار عثمان بزدار سے پاکستان تحریک انصاف کے چیف آرگنائزر سیف اللہ نیازی کی قیادت میں پنجاب کے تینوں ریجن کے صدور اورجنرل سیکرٹریز کی ملاقات ہوئی تھی۔

  ملاقات میں صوبہ پنجاب میں پارٹی امور اور کوآرڈینیشن کو مزید بہتر بنانے پر تبادلہ خیال کیا گیا جبکہ نچلی سطح پر پارٹی کو فعال اور موثر بنانے کیلئے تجاویز پر غور کیا تھا۔

سردار عثمان بزدار نے کہا تھا کہ پاکستان تحریک انصاف کے عہدیداروں اور کارکنوں کے جائز کام ترجیحی بنیادوں پر ہوں گے کیونکہ کارکن تحریک انصاف کا قابل قدر اثاثہ ہیں۔

  عثمان بزدار نے یہ بھی کہا تھا کہ تحریک انصاف کے عہدیداروں اور کارکنوں سے ہر ضلع میں جا کر ملاقات کروں گا جبکہ عوام کے مسائل کے حل کے لئے پارٹی عہدیداروں سے مشاورت کا سلسلہ جاری رکھوں گا۔