بھارت کی پیرا ملٹری فورس سے مستعفیٰ ہونے والی ڈپٹی کمانڈنٹ کرونا جیت نے سنگین الزام عائد کیا ہے کہ پیرا ملٹری فورس میں شامل خواتین اہلکاروں کا جنسی استحصال کیا جاتا ہے۔

انڈو تبت بارڈر پولیس سے استعفی دینے والی ڈپٹی کمانڈنٹ کرونا جیت کور نے انٹرویو میں انکشاف کی ہے کہ 5 سال قبل ہی پیرا ملٹری فورس میں شمولیت اختیار کی تھی اور چندی گڑھ میں تعینات تھیں۔

کرونا جیت کور نے کہا کہ انہیں مئی جون میں ایک مہینے کے لیے اترکھنڈ کی آٹھویں بٹالین میں تعینات کیا گیا جہاں سے انہیں اگلے مورچوں پر بھیجا گیا، ان میں سے ایک ملیاری پوسٹ تھی جہاں 9 اور 10 جون کی درمیانی شب بٹالین میں شامل ایک کانسٹیبل زبردستی ان کی بیرک میں گھسا اور ان سے جنسی زیادتی کی کوشش کی۔

مستعفی ہونے والی ڈپٹی کمانڈنٹ نے یہ بھی کہا کہ اگر ایک کانسٹیبل، ڈپٹی کمانڈنٹ کا ہاتھ پکڑ کر یہ  نیچ حرکت کر سکتا ہے تو آپ اس فورس میں شامل دیگر خواتین کی عزت کے بارے میں خوب اندازہ لگا سکتے ہیں۔

کرونا جیت نے یہ الزام بھی لگایا کہ پیرا ملٹری فورس میں خواتین اہلکاروں کو محض فوجیوں کی جنسی خواہشات کو پورا کرنے کے ليے ہی بھرتی کیا جاتا ہے۔

کرونا جیت کا کہنا تھا کہ اس واقعے کے بعد بٹالین کے کمانڈنٹ افسر اور فورس کے اعلیٰ افسران نے  بھی کوئی کارروائی نہیں کی جس پر میں نے ایف آئی آر درج کروائی اور اب معاملہ عدالت میں ہے۔

کرونا جیت کور کا اپنے انٹرویو میں مزید کہنا تھا کہ فورس میں ہونے کی وجہ سے انہیں فورس کے نظم و ضبط کو قائم رکھنا تھا اور ایسے میں سچ سامنے نہیں لاسکتی تھی اسی لیے مستعفی ہونا پڑا۔