پاکستان اور جرمنی کے مابین پن بجلی اور رینیوایبل توانائی فیز 2 پراجیکٹ کے لئے مالی اعانت کے معاہدے پر دستخط ہوگئے ہیں، جس کے تحت جرمنی پاکستان کو 12.5 ملین یورو کی مالی اعانت فراہم کرے گا۔

معاہدے پر سیکرٹری اقتصادی امور پرویز عباس اور جرمن ڈیویلپمنٹ بینک کے ایف ڈبلیو کے کنٹری ڈائریکٹر ولف گینگ مولرز نے دستخط کئے، وفاقی وزیر برائے اقتصادی امور ڈویژن حماد اظہر بھی اس موقع پر موجود تھے۔

معاہدے کے تحت ، کے ایف ڈبلیو حکومت گلگت بلتستان اور آغا خان رورل سپورٹ پروگرام کو گرانٹ فراہم کرے گی، جو  منصوبے کے دو پہلوئوں پر خرچ ہوگی، منصوبے میں ایک پن بجلی منصوبہ اور  دوسرا بائیو ڈائیورسٹی کا منصوبہ شامل ہے۔

وفاقی وزیر اقتصادی امور حماد اظہر نے اس موقع پر گرانٹ کے لئے جرمن حکومت کے شکریہ ادا کرتے ہوئے کہا کہ یہ پراجیکٹ گرین انرجی فراہم کرے گا اور اس معاہدے کے تحت ہنزہ اور نانگا پربت جیسے علاقوں میں معیار زندگی بلند ہوگا۔

وفاقی وزیر حماد اظہر نے کہا کہ گلگت بلتستان میں بجلی کی شدید ضروریات پوری کرنے میں بھی مدد ملے گی، جرمن ڈیویلپمنٹ بینک کے ایف ڈبلیو کے کنٹری ڈائریکٹر ولف گینگ مولرز نے اظہار خیال کرتے ہوئے کہا کہ جرمن ڈیولپمنٹ بینک گلگت جیسے خوبصورت علاقے میں بجلی کی فراہمی کے پراجیکٹ میں اپنا کردار ادا کرنے پر خوشی کا اظہار کرتا ہے، پاکستان کے شمالی علاقہ جات کو ترقی کی ضرورت ہے، ان علاقوں میں بجلی کے آنے سے کاروبار سیاحت اور تعلیم کے مواقع پیدا ہوں گے۔

واضح رہے کہ اس سے قبل بھی پاکستان کے توانائی سیکٹر کی بہتری کیلئے ایشیائی ترقیاتی بینک دوارب ڈالر مزید فراہم کرنے کا فیصلہ کیا ہے جبکہ بینک کی جانب  سے  یہ رقم آئندہ تین سال میں فراہم کی جائے گی۔