صوبائی وزیر صنعت و تجارت میاں محمد اسلم اقبال نے کہا ہے کہ عوام کو ریلیف کی فراہمی کیلئے اسی جذبے اورمحنت کے ساتھ کام جاری رکھنا ہوگا۔

صوبائی وزیر صنعت و تجارت میاں محمد اسلم اقبال کی زیر صدارت وزیراعلیٰ آفس میں ٹاسک فورس برائے پرائس کنٹرول کا اجلاس ہوا جس میں صوبائی وزراء ہاشم جواں بخت، نعمان اختر لنگڑیال،سیکرٹری صنعت و تجارت،متعلقہ محکموں کے سیکرٹریز اوراعلی حکام نے اجلاس میں شرکت کی۔

اجلاس میں صوبے بھر میں اشیاء ضروریہ کی قیمتوں کی مانیٹرنگ اورپرائس کنٹرول میکانزم پر عملدرآمد کا جائزہ لیاگیا۔

میاں اسلم اقبال کا اجلاس میں کہنا تھا کہ اشیاء ضروریہ کی قیمتوں میں استحکام لانے کے حوالے سے متعلقہ اداروں اورانتظامیہ نے شاندار کام کیا ہے جبکہ اشیاء ضروریہ کی طلب اوررسد کے حوالے سے پیش بینی کا موثر نظام بنایا جائے گا۔

انہوں نے کہا کہ جن 15اضلاع میں ابھی تک ماڈل بازار نہیں بنے وہاں زمین کی نشاندہی کا عمل ایک ہفتے میں مکمل کیا جائے کیونکہ دوسرے مرحلے میں تحصیل کی سطح پر ماڈل بازار بنائے جائیں گے۔

انہوں نے مزید کہا کہ ڈپٹی کمشنر اورڈی پی او ہفتے میں دو بار جبکہ اسسٹنٹ کمشنر اورایس ڈی پی او ہفتے میں تین بار منڈیوں کے اچانک دورے کریں گے جبکہ گراں فروشی،ناجائزمنافع خوری اورذخیرہ ا ندوزی انسانیت کے خلاف جرم ہے،کسی صورت برداشت نہیں کریں گے۔

میاں اسلم اقبال نے بتایا کہ عوام کی جیبوں پر ڈاکہ ڈالنے والے گراں فروشی کی جگہ جیل ہے

صوبائی وزیر خوراک سمیع اللہ چوہدری،صوبے بھر کے کمشنرز اورڈپٹی کمشنرز ویڈیولنک کے ذریعے اجلاس میں شریک ہوئے۔