سکھر کی احتساب عدالت نےآمدن سے زائد اثاثہ جات کیس میں پاکستان پیپلز پارٹی کے رہنما خورشید شاہ کے جوڈیشل ریمانڈ میں 5 روز کی توسیع کر دی ہے۔

تفصیلات کے مطابق پیپلز پارٹی کے سینئررہنماخورشید شاہ کی جوڈیشل ریمانڈ میں توسیع کرتے ہوئے ان کو 12 دسمبر کو دوبارہ پیش ہونے کاحکم دے دیاگیاہے۔

نیب کی جانب سےعدالت سے خورشید شاہ کے 15 روزہ جوڈیشل ریمانڈ کی استدعا کی گئی تھی، تاہم عدالت نے صرف پانچ دن کا ریمانڈ منظور کیا۔

خورشید شاہ کی پیشی کے دوران احتساب عدالت اور اطراف میں سیکورٹی کے سخت انتظامات کیے گئے تھے، شیری رحمان، اویس شاہ اور دیگر رہنما بھی احتساب عدالت پہنچ گئے تھے، جیالوں کی بڑی تعداد بھی موجود تھی۔

 کمرہ عدالت میں خورشید شاہ کے وکیل نےکہا کہ ان کے موکل کو 82 روز ہوگئے، نیب شواہد پیش کرنے میں ناکام رہا۔

انہوں نے کہاکہ خورشیدشاہ پرکوئی کیس نہیں بنتا، کیس میں ضمانت نہیں لے رہے تاکہ نیب مکمل انکوائری کر لے۔

نیب وکیل نے کہا کہ سینئر پی پی رہنما پرانویسٹی گیشن کرنے کے لیے چیئرمین نیب سے اجازت طلب کی ہے، انویسٹی گیشن کی اجازت ملنے پر عدالت کو آگاہ کیاجائے گا، خورشید شاہ کے ریمانڈ کو ابھی 90 روز مکمل نہیں ہوئے،اس لیے مزید ریمانڈ دیا جائے، آصف زرداری تو 120 روز سے نیب تحویل میں ہیں۔

بعد ازاں عدالت نے خورشید شاہ کے جوڈیشل ریمانڈ میں 5 روز کی توسیع کر دی۔

خیال رہے کہ پیپلزپارٹی رہنما کو 15 روزہ ریمانڈ ختم ہونے پر عدالت میں پیش کیا گیا تھا، نیب تاحال ان کے خلاف ٹھوس ثبوت نہیں لا سکی ہے۔

سینیئرپیپلز پارٹی رہنماآمدن سے زائد اثاثہ جات کیس میں گرفتار ہیں۔ خورشید شاہ کوسکھر کی احتساب عدالت میں جوڈیشل ریمانڈ مکمل ہونے پر پیش کیاگیا۔

خورشید شاہ کی گزشتہ  پیشی کے موقع پرصوبائی وزیر ٹرانسپورٹ سید اویس شاہ،ایم پی اے سید فرخ شاہ سمیت دیگر پی پی رہنما عدالت میں موجودرہے۔