وزیراعظم عمران خان نے کہا ہے کہ افسران اپنی ذمہ داریاں جہاد اور قومی فریضہ سمجھ کرادا کریں۔

تفصیلات کے مطابق وزیرِاعظم عمران خان سے حال ہی میں ترقی پانے والے وفاقی سیکرٹریز کی ملاقات ہوئی جس میں وزیرِاعظم عمران خان نے ترقی پانے والے افسران کو مبارکباد دی جبکہ سیکرٹریز نے ملک کی تعمیر و ترقی کے لئے اپنا بھرپور کردارادا کرنے کی یقینی دہانی کرائی۔

اس موقع پر وزیراعظم نے کہا کہ افسران کی ترقی انکی کارکردگی اور خالصتاً میرٹ کو مدنظر رکھ کر کی گئی ہے، امید ہے افسران اپنی نئی ذمہ داریاں  نہایت فرض شناسی اور ملک و قوم کی خدمت کے بھرپورجذبے کے تحت ادا کریں گے۔

عمران خان نے یہ بھی کہا کہ پاکستان تاریخ کے اہم دوراہے پر کھڑا ہے اور ملک کی تعمیر و ترقی کے لئے جہاں سیاسی لیڈرشپ نے وژن دینا ہے وہاں بیوروکریسی نے اس وژن کو عملی جامہ پہنانا ہے۔

وزیراعظم کا کہنا تھا کہ ساٹھ کی دہائی میں گورننس کے لحاظ سے مثالی سمجھاجانے والا ہمارا ملک آج خطے میں دوسرے ممالک سے قدرے پیچھے رہ گیا ہے اور ملک پیچھے رہ جانے کی مختلف وجوہات ہیں۔

عمران خان کا یہ بھی کہنا تھا کہ آج سیاسی قیادت اور بیوروکریسی نے ملک کے مستقبل کا تعین کرنا ہے جبکہ نئی سوچ اور بہتر طرز حکومت (گڈگورننس) کی ضرورت ہے۔

وزیراعظم نے کہا کہ اللہ تعالیٰ نے پاکستان کو بے پناہ وسائل اور افرادی قوت سے نوازا ہے، گذشتہ پندرہ ماہ میں غیر ملکی سرمایہ کاروں نے معیشت کے ہر شعبے میں دلچسپی کا اظہار کیا ہے۔

عمران خان نے یہ بھی کہا کہ موجودہ حکومت کی کوششوں کی وجہ سے آج ملک میں معاشی استحکام ہے جبکہ ملکی وغیر ملکی سرمایہ کار اور کاروباری برادری ملکی معیشت اور پالیسیوں پر اعتماد کا اظہار کر رہے ہیں۔

عمران خان کا کہنا تھا کہ بین الاقوامی ادارے بھی ملکی معیشت میں آنے والی بہتری کا اعتراف کررہے ہیں، ضروری ہے کہ بیوروکریسی طرز حکومت اور عوام کی فلاح و بہبود کے ضمن میں اپنابھرپور کردار ادا کرے۔

وفاقی سیکرٹریز سے ملاقات میں عمران خان نے کہا کہ ماضی میں بیرون ملک پاکستانیوں اور غیر ملکی سرمایہ کاروں کی گورننس کے مسائل کی وجہ سے حوصلہ شکنی ہوئی اور ہم نے اس ماحول کو بہتر کرنا ہے۔

عمران خان نے یہ بھی کہا کہ بیرون ملک پاکستانیوں اور سرمایہ کاروں خصوصاً چھوٹے اور درمیانے درجے کے سرمایہ کاروں کے لئے ساز گار ماحول پیدا کرنا اور کاروبار میں مزید آسانیاں فراہم کرنی ہیں۔

وزیراعظم عمران خان نے مزید کہا کہ بہتر طرز حکومت (گڈ گورننس) کے حوالے سے وفاقی بیوروکریسی مثال قائم کرے جبکہ سیکرٹریز اپنی توانائیاں  اور تجربہ ملک و قوم کی خدمت اور عوامی فلاح و بہبودکے لئے برؤے کار لائیں جس پر سیکرٹریز نے وزیرِ اعظم عمران خان کا شکریہ ادا کیا۔