نیویارک میں اقوام کے سیکرٹری جنرل انتونیوگوتریز سے پاکستان کے وزیر خارجہ شاہ محمود قریشی کی ملاقات ہوئی۔

ملاقات میں وزیرخارجہ نے اقوام متحدہ کے سیکرٹری جنرل کوامریکہ اورایرا ن تنازع کی وجہ سے مشرق وسطیٰ میں پیدا ہونے والی کشیدگی ختم کرانے کے لئے پاکستانی اقدامات سے آگاہ کیا جبکہ مقبوضہ کشمیرمیں انسانی حقوق کی سنگین خلاف ورزیوں کے بارے میں بھی تبادلہ خیال کیا ۔

شاہ محمودقریشی نے مقبوضہ کشمیرکی کشیدہ صورتحال پرغوروخوض کے لئے سلامتی کونسل کااجلاس طلب کرنے پربھی سیکرٹری جنرل کاشکریہ ادا کیا۔اس موقع پراظہارخیال کرتے ہوئے اقوام متحدہ کے سیکرٹری جنرل نے خطے میں قیام امن کیلئے پاکستان کی کوششوں کوسراہا۔

اس موقع پر وزیر خارجہ نے  اقوام متحدہ کے سیکرٹری جنرل کو اپنے حالیہ دورہ سعودی عرب اورایران کے بارے میں بھی آگاہ کیا جو خطے میں کشیدگی کم کرنے کے لئے وزیراعظم عمران خان کی خصوصی ہدایت پرکیاگیا۔

شاہ محمود قریشی نے کہا کہ علمی برادری کا فرض ہے کہ کشمیریوں کے لئے آواز اٹھائیں اور انڈیا پر دباؤ ڈالے کہ کرفیو اور ظلم بربریت کا خاتمہ کرکے اقوام متحدہ کے مطابق حق خود اردیت دیا جائے۔

وزیر خارجہ سے اقوام متحدہ کی جنرل اسمبلی کے صدر کی ملاقات

شاہ محمود قریشی نے جنرل سیکٹری سے یہ بھی  کہا کہ مشرق وسطی اور مقبوضہ کشمیر میں انسانی حقوق کی خلاف ورزیوں پر سخت تشویش ہے، اسی لاکھ کشمیریوں کو پانچ اگست سے آج تک کرفیو اور شدید بربریت کا سامنا ہے ۔

وزیرخارجہ شاہ محمودقریشی نے اقوام متحدہ کی سلامتی کونسل پرزوردیاہے کہ وہ مقبوضہ کشمیر میں بھارتی ظلم وستم رکوانے کے لئے اپنا کردار ادا کرے۔

سیکرٹری جنرل انتونیوگوتریز سے پاکستان کے وزیر خارجہ شاہ محمود قریشی کی ہونے والی اس ملاقات میں یواین او میں پاکستان کے سفیر منیر اکرم بھی موجود تھے ۔

دریں اثنا وزیرخارجہ مخدوم شاہ محمود قریشی نے اقوام متحدہ میں بھی بریفنگ دیتے ہوئے کہا کہ کشمیریوں کو ظلم و بربریت کا نشانہ بنایا جا رہا ہے، اقوام متحدہ اور عالمی برادری معصوم کشمیریوں کو بھارتی جبرواستبداد سے نجات دلانے کے لئے نتیجہ خیز اقدام اٹھائے۔

وزیرخارجہ نے کہا کہ ذرائع ابلاغ پر مکمل پابندی اور مواصلات کے بلیک آؤٹ کے ذریعے حقائق کو دنیا کی نظروں سے اوجھل رکھنے کی کوشش کی جا رہی ہے۔

مشرق وسطی میں جاری کشیدگی کے حوالے سے وزیرخارجہ نے کہا کہ خطہ کسی نئی محاذآرائی کا متحمل نہیں ہو سکتا جبکہ پاکستان مشرق وسطی کے بحران میں فریق نہیں بنے گا۔

وزیرخارجہ شاہ محمود قریشی نے مزید کہا کہ خطے میں قیام امن کیلئے پاکستان اپنا متحرک اور مثبت کردار ادا کرنے کے لئے پر عزم ہے۔