وفاقی دارالحکومت اسلام آباد میں بارش کا سلسلہ وقفے وقفے سے جاری ہےجبکہ مزید بارشیں متوقع ہیں۔

بلوچستان کے شمال مشرقی علاقوں میں وقفہ وقفہ سے جاری گرج چمک کے ساتھ موسلادھار بارشوں نے سیلابی صورتحال پیدا کردی، سیلابی ریلے اور برف باری کے باعث کئی سڑکیں بلاک ہوگئیں اورندی نالوں میں طغیانی آگئی۔

بلوچستان کے شمال مشرقی علاقوں میں بارش اور برفباری کا سلسلہ جاری ہے، ندی نالوں میں طغیانی سے سیلابی کیفیت پیدا ہوگئی ہے۔

ڈپٹی کمشنرنوشکی کے مطابق مختلف علاقوں میں ایک درجن سےزائد مکانوں کی دیواریں گرگئیں اور کچے مکانات کو نقصان پہنچا۔

کمانڈنٹ نوشکی کرنل محمد آصف نے سیلاب سے متاثرہ علاقوں کا دورہ کیا۔

مستونگ کےنواحی قصبے شیریں آب میں سیلابی ریلہ داخل ہوگیا۔ وادی زیارت میں ڈیڑھ سے دو فٹ تک برف پڑچکی ہے۔ برفباری سے متعدد رابطہ سڑکیں بھی بند ہوگئی ہیں۔

آزادکشمیراور گلگت بلتستان سمیت ملک کے بالائی علاقوں میں برف باری کا سلسلہ جاری ہے۔

مری، گلیات اور مانسہرہ کے سیاحتی مقامات شوگران، ناران، سوات کی وادی کالام، مالم جبہ اور میاندام، اور لوئردیر میں برفباری جاری ہے۔

آزاد کشمیر میں نیلم، ہٹیاں بالا، جہلم ویلی، باغ، پونچھ اور حویلی، پلندری کے بلند مقامات پر برفباری اور زیریں علاقوں میں بارش ہوئی۔

استورمیں برفباری سے زلزلہ متاثرین کی مشکلات اور مسائل میں مزید اضافہ ہوگیا۔ گلگت، دیامر، غذر، نانگا پربت سمیت بالائی علاقوں میں بھی برفباری سے سردی میں اضافہ ہوگیا ہے۔

جنوبی وزیرستان میں تین فٹ برف پڑچکی ہے۔ پارہ چنار میں شدید برف باری سے معمولات زندگی متاثر ہوئے ہیں۔

لاہور سمیت پنجاب کےدیگرضلعوں میں وقفہ وقفہ سے بادل برس رہے ہیں اور سردی کی شدت میں اضافہ ہوگیا ہے۔

گذشتہ 24 گھنٹے کا موسم بلوچستان، خیبرپختونخوا، پنجاب میں اکثرمقامات پر جبکہ بالائی سندھ ، کشمیر اور گلگت بلتستان میں چند مقامات پر بارش ہوئی۔

اس دوران مالم جبہ، کالام ،پاراچنار، ژوب اور بگروٹ میں برفباری بھی ریکارڈ ہوئی۔