پاکستان عوامی تحریک کے سربراہ ڈاکٹر طاہر القادری نے  کہا ہے کہ یہ نیا پاکستان ہے جہاں قانون سب کیلئے برابر ہےلیکن قتل کرنے اور کروانے والے آزاد گھوم رہے ہیں جبکہ قتل عام پر پرامن احتجاج کرنے والے 107 کارکنوں کو سزائیں سنا دی گئی ہیں۔

تفصیلات کے مطابق پاکستان عوامی تحریک کے سربراہ ڈاکٹر طاہر القادری نے وزیر اعظم پر طنز کرتے ہوئے کہاہے کہ عمران خان  کو مبارک ہو ان کے نئے پاکستان میں قانون سب کے لیے برابر ہوگیا ہے، سزا یافتہ مجرم بیرون ملک جانے کے لیے آزاد ہیں جبکہ سانحہ ماڈل ٹاؤن کے اسیروں کی آپریشن تھیٹر میں بھی ہتھکڑیاں نہیں کھلتی ہیں۔

ڈاکٹر طاہر القادری نے یہ بھی  کہا کہ ساڑھے 5 سال گزر جانے کے بعد بھی شہدائے ماڈل ٹاؤن کے ورثاء کو انصاف نہیں ملا، حکومت بدلی مگر شہدائے ماڈل ٹاؤن کے ورثاء اور بے گناہ اسیروں کے لیے کچھ نہیں بدلا۔

پاکستان عوامی تحریک کے سربراہ ڈاکٹر طاہر القادری نے  مزید کہا کہ یہ نیا پاکستان ہے جہاں قانون سب کے لیے برابر ہے،محمد سلطان کے ساتھ جو سلوک ہوا وہ ہر اعتبار سے شرمناک ہے۔

طاہر القادری کا سیاست چھوڑنے کا فیصلہ

واضح رہے اس سے قبل  پاکستان عوامی تحریک کےسربراہ نے پارٹی کی چیئرمین شپ سے مستعفی ہونے کا اعلان کردیاتھا  جبکہ طاہرالقادری نے پاکستان عوامی تحریک کی چئیرمین شپ اوراختیارات کورکمیٹی کےسپرد کردی۔

ان کاکہنا تھا کہ میں اپنے تمام تراختیارات سپریم کونسل کو دے رہا ہوں، پاکستان عوامی تحریک کی سیاسی سرگرمیوں سے بھی ریٹائرمنٹ کا اعلان کرتا ہوں۔

طاہر القادری کا  یہ بھی کہنا تھا  کہ موجود نظام میں پارلیمنٹ صرف ایک ڈیبیٹ کلب ہےجبکہ  انتخابی نظام دھاندلی کرپشن زدہ ہے، پارلیمنٹ کا فوکس سیاستدانوں کے مفادات کا تحفظ ہے۔

انہوں نے کہا  تھا کہ سانحہ ماڈل ٹاون وہیں کھڑا ہے جہاں آج سے 5 سال قبل کھڑا تھا۔

 طاہرالقادری کا  مزید کہناتھاکہ ریٹائرمنٹ کااعلان کسی مایوسی کی وجہ سے نہیں کیا نہ کبھی مایوس ہوا اورنہ ہوں گابلکہ عوامی تحریک کی سرپرستی سےریٹائرمنٹ کااعلان کیاہے، سانحہ ماڈل ٹاون کے انصاف کےحصول سے نہیں۔