مکہ مکرمہ دُنیا بھر کے مسلمانوں  کے لیے مقدس ترین شہر ہے۔ اسی وجہ سے مکہ کی حُرمت کا خاص خیال رکھا جاتا ہے۔

تاہم کچھ عرصہ سے دُنیا کے اس مقدس ترین شہر میں بے حیائی پر مبنی ایسے واقعات  رونما ہو رہے ہیں جنہوں نے تمام مسلمانوں کے دِلوں کو مجروح کر دیا ہے۔

گورنر مکہ مکرمہ شہزادہ خالد الفیصل نے سوشل میڈیا پر اپ لوڈ ہونے والی ڈانس ویڈیو پر فوری ایکشن لیتے ہوئے ڈانسر اور ویڈیو بنانے والے افراد کی گرفتاری کا حکم صادر کردیا ہے۔

غیر ملکی خبر رساں ادارے  کے مطابق لڑکیوں پر مشتمل ایک گروپ نے مغربی ڈانس کرتے ہوئے سوشل میڈیا پر ویڈیو اپ لوڈ کی جس میں ڈانسر نے خود کو ’مکہ کی لڑکی‘ کہتے ہوئے اپنا تعارف کرایا۔

ویڈیو سوشل میڈیا پر وائرل ہونے کے بعد گورنر مکہ مکرمہ شہزادہ خالد الفیصل نے متعلقہ اداروں کو احکامات صادر کرتے ہوئے کہا ہے کہ مذکورہ گروپ کو گرفتار کرکے واقعہ کی تحقیقات کی جائے۔

https://twitter.com/i/status/1222945948269187072

غیر ملکی ویب سائٹ کے مطابق گورنر نے مذکورہ واقعہ پر شدید برہمی کا اظہار کرتے ہوئے کہا کہ اس قسم کی موسیقی ہماری ثقافت اور اقدار کے خلاف ہے۔

گورنر نے متعلقہ اداروں کو حکم دیا ہے کہ مذکورہ گروپ کے خلاف تحقیقات کرکے انہیں قرار واقعی سزا دی جائے۔

سعودی عرب میں ایک اورتبدیلی،خواتین کی کھلے عام سگریٹ نوشی

واضح رہے کہ سوشل میڈیا پر مذکورہ ویڈیو اپ لوڈ ہونے کے بعد لوگوں نے شدید ردعمل کا اظہار کیا ہے۔

مقبل المقبل نے کہا کہ ’گورنر خالد الفیصل آپ کا بے حد شکریہ کہ آپ نے فوری ایکشن لیتے ہوئے اس قسم کی حرکت کرنے والوں کا سدبا ب کیا۔‘

محمد الغامدی کا کہنا تھا کہ ’ یہ کونسی مکہ کی لڑکی ہے جو خود کو اہل مکہ بتاتی ہے اس کا مکہ اور اہل مکہ سے کوئی تعلق نہیں۔ اللہ تعالیٰ مکہ اور اس کی خواتین کو اس لڑکی کے شر سے محفوظ رکھے۔‘

واضح رہے کہ وز العُتیبی نے 29 جنوری کواپنی ایک انتہائی شرمناک تصویر پوسٹ کی ہے جس میں وہ ایک مشہور ثقافتی مقام پر اپنے خاوند کے ساتھ سر عام بوس و کنار میں مصروف ہے۔

اس موقع پر اس نے سفید رنگ کا ایسا فراک پہن رکھا ہے جس میں اُس کا جسم عریانی کی حدوں کو چھو رہا ہے۔