پاکستان پیپلزپارٹی کے چیئرمین بلاول بھٹو زرداری نے کہا ہے کہ وفاقی حکومت کورونا وائرس کے خلاف سست روی سے فیصلے کر رہی ہے۔

تفصیلات کے  مطابق پاکستان پیپلزپارٹی کے چیئرمین بلاول بھٹو زرداری نے  عالمی خبررساں ادارے اے ایف پی کو انٹرویو دیتے ہوئے کہا کہ وفاقی حکومت لاک ڈاﺅن کے لئے کوئی ٹھوس فیصلہ کرنے میں ناکام نظر آتی ہے جبکہ وفاقی حکومت صحت کے شعبے میں رقم مہیا کرنے کے لئے بھی تیار نہیں۔

 بلاول بھٹو زرداری نے کہا کہ  اب تک پاکستان نے اس وباءسے 94لوگ فوت ہو چکے ہیں جبکہ پاکستان میں 5230 افراد میں کورونا وائرس کی تصدیق ہو چکی ہے اور پاکستان میں حفاظتی لباس اور طبی عملے کی کمی کے ساتھ ساتھ دیگر طبی آلات کی بھی کمی ہے ۔

پاکستان پیپلزپارٹی کے چیئرمین نے یہ بھی کہا کہ اس وباءکے پھیلنے کی ابتدا ہی سے ایک غلط احساس تحفظ کا اظہار کیا جا رہا ہے، ہم اس حقیقت کو نظرانداز کر رہے ہیں کہ دنیا بھر میں یہ وباءکس قدر تیزی سے پھیل رہی ہےجبکہ وباء کی تیزی کا احساس نہ ہونے کی وجہ سے ہمیں بروقت ضروری اقدامات اٹھانے میں مشکلات پیش آرہی ہیں۔

اپنے بیان میں بلاول بھٹو زرداری کا کہنا تھا کہ پاکستان میں صحت کے ماہرین نے یہ تجویز دی تھی کہ پورے ملک میں سخت اقدامات کئے جائیں، ہم معیشت کو دوبارہ زندہ کر سکتے ہیں لیکن لوگوں کو دوبارہ زندہ نہیں کر سکتے۔

پاکستان پیپلزپارٹی کے چیئرمین بلاول بھٹو زرداری  کا مزید کہنا تھا کہ ہم صرف یہ امید نہیں کرسکتے کہ سب خود اچھا ہوجائے گا اور اگر ہم اپنی تیاری نہ کریں تو پاکستان بہت خاموشی سے ایک تباہی کی صورتحال کی طرف جاسکتا ہے یا پھر صورتحال امریکہ اور مغربی یورپ سے بھی بری ہو سکتی ہے ۔