پیرس میں پاکستانی سفارتخانےکی طرف سے قونصلر سیکشن کھولنے کا باقاعدہ اعلان کردیا گیا ہے۔

تفصیلات کے مطابق فرانس میں پاکستان کے سفیر معین الحق نے کہا کہ  فرانسیسی حکومت کی ہدایات کی روشی میں سفارت خانہ پاکستان نے قونصلر سیکشن میں پاکستانی کمیونٹی کے ضرورت مند افراد کیلئے خدمات فراہم کرنے کا سلسلہ شروع کر دیا گیا ہے ۔

فرانس میں پاکستان کے سفیر نے کہا کہ خدمات کی فراہمی فرانسیسی حکومت کی ہدایات کو مدنظر رکھتے ہوئے انتہائی نظم و ضبط اور تمام تر حفاظتی انتظامات کو بروئے کار لاتے ہوئے منگل، جمعرات اور جمعہ کو کی جائے گی جبکہ سفارت خانہ میں سہولتوں کی فراہمی کیلئے آمد صرف وقت لے کر آنے پرہی ممکن ہو سکے گی۔

معین الحق نے یہ بھی کہا کہ کمیونٹی کے تمام افراد سے التماس ہے کہ وہ سفارت خانہ میں آنے سے پہلے سفارت خانہ کی ویب سائٹ سے ملاقات کا وقت لے کر آئیں اور سفارت خانہ میں ایک وقت میں دس افراد سے زیادہ داخل نہ ہوں۔

فرانس میں پاکستان کے سفیر کا کہنا تھا کہ مجھے انتہائی دکھ کے ساتھ کہنا پڑھ رہا ہے کہ آج (منگل ) کی صبح سفارت خانہ کے باہر پاکستانی حضرات کثیر تعداد میں بغیر احتیاطی تدابیر کو بروئے کار لاتے ہوئے جمع ہو گئے تھےجس کی وجہ سے نہ صرف ان کی اپنی صحت کو خطرہ بلکہ دوسروں کی زندگیوں کیلئے بھی خطرے کا باعث بنتا جبکہ سفارت خانہ کی انتظامیہ کو فرانسیسی حکومت کے سامنے بھی شرمندگی اٹھانی پڑھ سکتی تھی۔

پاکستانی سفارتی عملے کی ووہان میں طلبہ سے ملاقات

معین الحق کا یہ بھی کہان تھا کہ میں پاکستانی کمیونٹی سے ایک مرتبہ پھر التماس کرتا ہوں کہ سفارت خانہ آپ کی خدمت کیلئے ہر وقت اور ہر حال میں حاضر ہے تاہم آپ سے درخواست ہے کہ سفارت خانہ میں ضروری سہولیات کے حصول کیلئے انتہائی نظم و ضبط کا مظاہرہ کریں تاکہ آپ اپنی صحت کی حفاظت کے ساتھ ساتھ دوسروں کی صحت کو خطرے سے دوچار ہونے سے بچاسکیں۔

فرانس میں پاکستان کے سفیر معین الحق نے امید ظاہر کی کہ پاکستانی کمیونٹی سفارتخانے کے ساتھ پوری طرح تعاون کریں گے اور آئندہ صرف اور صرف انتہائی ضروری حاجت کی صورت میں سفارت خانہ کی ویب سائٹ سے ملاقات کا وقت لے کر ہی سفارت خانہ میں تشریف لائیں۔

یاد رہے کہ فرانسیسی حکومت کی طرف سے لاک ڈاؤن بتدریج نرمی کے اعلا ن کے بعد پیرس اور اس کے مضافاتی علاقے ابھی بھی ریڈ زون میں ہیں اور یہاں پر کچھ پابندیاں ابھی بھی برقرار ہیں۔