عالمی وبا کورونا کی وجہ سے بیلجیئم میں بھی مساجد میں نماز ادا کرنے کی اجازت نہیں تھی۔

تفصیلات کے مطابق بیلجیئم میں 5 جون سے مساجد میں نماز ادا کرنے کا اعلان کر دیا گیا ہے۔

بیلجیئم میں 5 جون بروز جمعہ سے مساجد میں نماز باجماعت کا آغاز ہوجائےگا۔

یاد رہے کہ کورونا وائرس کے پھیلاؤ کی روک تھام کی غرض سے مارچ میں تمام عوامی اجتماعات پر پابندی عائد کی گئی تھی۔

 دوسری جانب باجماعت نمازوں کے آغاز کی یہ اطلاع پاکستانی کمیونٹی کی مولن بیک میں واقع مسجد پاکستان اسلامک سینٹر کی جانب سے فراہم کی گئی ہے۔

تاہم انتظامیہ کے مطابق نمازی وضو گھر سے کرکے آئیں گے اور اپنی جاء نماز ساتھ لائیں گے اور مساجد میں صرف فرض نماز کی ادائیگی ہوگی۔

اس کے علاوہ  مساجد میں ماسک لازمی پہننا ہوگا اور جماعت کے دوران ڈیڑھ میٹر کا حفاظتی فاصلہ برقرار رکھنا ہوگا۔

 واضح رہے کہ 55 سال سے زائد عمر کے افراد کو باجماعت نماز کیلئے مسجد میں تشریف لانے کی اجازت نہیں ہے۔