صوبائی وزیر اطلاعات سید ناصر حسین شاہ نے کہا ہے کہ وفاقی حکومت مانگے تانگے کی اور ایک غیر مستحکم حکومت ہے۔

تفصیلات کے مطابق صوبائی وزیر اطلاعات سید ناصر حسین شاہ نے میڈیا سے گفتگو کرتے ہوئے کہا کہ سر سبز و شاداب ماحول وقت کی ضرورت ہے، ہم پورے سندھ میں پھلوں اور نیم کے درخت لگانے جا رہے ہیں، بلاول صاحب کے ویژن کے مطابق پورے سندھ کو سر سبز و شاداب کرنا ہے۔

صوبائی وزیر اطلاعات نے کہا کہ وفاقی حکومت نے کووڈ 19 کو سنجیدہ ہی نہیں لیا، ہمارا شروع سے بیانیہ تھا کہ پندرہ پندرہ دن کے دو لاک ڈائون کئے جائیں لیکن سنا نہیں گیا۔

سید ناصر حسین شاہ نے یہ بھی کہا کہ وفاقی حکومت مسلسل سندھ حکومت کو غیر مستحکم کرنے کی کوشش کر رہی ہے جبکہ وفاق کے چند وزرا ہمیشہ شور شرابا اور تنقید برائے تنقید کی سیاست کر رہے ہیں۔

صوبائی وزیر اطلاعات  کا کہنا تھا کہ ہوسکتا ہے کہ وزیر اعظم کا صوبہ سندھ کا جو دورہ تھا اس میں انہوں نے با ضابطہ طور پر وزیر اعلیٰ سندھ سے ملاقات کا شیدول نہیں رکھا تھا۔

سید ناصر حسین شاہ کا یہ بھی کہنا تھا کہ وزیر اعظم کے دورہ سندھ میں جب بھی وہ آتے ہیں تو وزیر اعلی سندھ انہیں خود لینے جاتے ہیں لیکن اس دفعہ جو ان کا پلان بھجوایا گیا تھا اس میں کچھ بھی اس طرح کا لکھا ہوا نہیں تھا جس کی وجہ سے وزیر اعلی سندھ نہیں جا سکے۔

کراچی میں پولیس نے 7 بجتے ہی علاقوں کو بند کرنا شروع کردیا

صوبائی وزیر اطلاعات نے کہا کہ پیپلز پارٹی ایک عوامی پارٹی ہے اور اسے عوام کا خیا ل ہے اس لئے کہ اس کی جڑیں عوام میں ہیں اور وہ ہمیشہ عوام کی فلاح و بہبود کے لئے اقدامات کرتی رہی ہے۔

سید ناصر حسین شاہ نے یہ بھی کہا کہ اس لئے ہم نے ایک عوامی بجٹ پیش کیا ہے جس میں اپنے وسائل کو مد نظر رکھتے ہوئے عوام کا خیال رکھا گیا ہے جبکہ اور چیئر مین بلاول بھٹو زرداری صاحب کی ہدایت پر تخواہیں اور خاص طور پر پنشن میں اضافہ کیا۔

صوبائی وزیر اطلاعات سید ناصر حسین شاہ نے  مزید کہا کہ سندھ حکومت کو پچھلے سال 230ارب روپے وفاق سے کم ملے تھے اسی طرح اس سال بھی اسی طرح کی صورتحال کا سامنا ہے اس کے باوجود سندھ حکومت نے اپنے اخراجا ت کو کم کرتے ہوئے غریب لوگوں کا خیال رکھا ہے ۔