وزیراعلیٰ خیبرپختونخوا محمود خان سے سابق صوبائی وزیر شہرام ترکئی نے ملاقات کی ہے ۔

ملاقات میں وزیراعلیٰ خیبرپختونخوا محمود خان اور شہرام ترکئی کے درمیان پائی جانے والی غلط فہمیاں دور ہوگئی ہیں۔

اس موقع پر وزیراعلیٰ خیبرپختونخوا محمود خان نے گفتگو کرتے ہوئے کہاکہ اُن کی کسی کے ساتھ ذاتی رنجش اور لڑائی نہیں ہے ،وہ بحیثیت ٹیم لیڈر حکومت اور پارٹی کے ایجنڈے پر عمل درآمد کو یقینی بنانے کیلئے کام کر رہے ہیں۔

محمود خان نے کہا کہ تمام ٹیم ممبران سے بھی توقع رکھتے ہیں کہ وہ پارٹی کے ایجنڈے کی تکمیل اور حکومتی اصلاحات کی کامیابی کیلئے اپنے اپنے حصے کا کردار ادا کریں ۔

وزیراعلیٰ خیبرپختونخوا محمود خان نے مزید کہا کہ ایجنڈے کی راہ میں جو بھی رکاوٹ بنے گا وہ پارٹی کا وفادار اور مخلص کارکن نہیں ہو سکتااور جو اس ایجنڈے کی تکمیل کیلئے خلوص نیت سے کام کرے گا ہم اُس کو بھر پور عزت دیں گے ۔

سابق صوبائی وزیر شہرام ترکئی سے وزیراعلیٰ خیبرپختونخوا محمود خان کی ہونے والی اس ملاقات میں گورنر خیبرپختونخوا شاہ فرمان بھی شریک ہوئے۔

دوسری جانب وزیراعلیٰ خیبرپختونخوا کی زیرصدارت اجلاس ہوا جس میں کورونا مریضوں کیلیے بیڈ کے انتظام کیلیے تدریسی اسپتالوں کے لیے فوکل پرسنز مقرر کرنے کی ہدایت کی گئی۔

اجلاس میں بریفنگ کے دوران بتایا گیا کہ جولائی کے وسط تک انسٹیٹیوٹ آف کارڈیالوجی میں 40 آئی سی یو بیڈ کا انتظام کیاجائےگا۔ کارڈیالوجی انسٹیٹیوٹ کی نئی عمارت میں یوٹیلٹی کنکشنز فوری مکمل کرنے کیلیے اداروں کوہدایت جاری کردی گئی ہے۔

بریفنگ میں مزید کہا گیا کہ جولائی کے وسط تک 110ایچ ڈی یو بیڈز اور  100 آئسولیشن بیڈ قائم کیےجائیں گے۔ پشاور کے تدریسی اسپتال ایل آر ایچ اور کے ٹی ایچ میں کورونا مریضوں کیلیے بیڈ دستیاب ہیں۔

وزیراعلیٰ خیبرپختونخوا محمود خان نے کہا کہ ایس او پیز پر عملدرآمد نہ کرنے والی مارکیٹوں کو بند کر دیا جائے، وزیر اعلیٰ نے انتظامیہ کو ہدایت کی کہ بازاروں میں ایس اوپیز پر عملدر آمد کے لیےتاجر تنظیموں سے بات کی جائے۔