شہرقائد کے مختلف علاقوں میں ہلکی بارش ہوئی ہے جس سے مو سم کچھ حد تک خوشگوار ہو گیا ہے۔

تفصیلات کے مطابق شہرقائد کے مختلف علاقوں میں ہلکی بارش سے گرمی کا زور ٹوٹ گیا، شارع فیصل،صدر،کلفٹن، ڈیفنس،محمود آباد اور اطراف میں ہلکی بارش سے موسم سہانا ہوگیا۔

محکمہ موسمیات کا کہنا ہے کہ شہر میں 29 کلو میٹر فی گھنٹہ کی رفتار سے مغربی سمت سے چلنے والی ہواؤں میں نمی کا تناسب 68 فیصد ہے۔

دوسری جانب اسلام آباد سمیت ملک کے مختلف شہروں میں آندھی اور گرج چمک کے ساتھ موسلا دھار بارش ہوئی جس سے موسم خوشگوار ہوگیا، آندھی چلنے سے بعض علاقوں میں درخت گر گئے جبکہ فیڈر ٹرپ کر جانے سے متعدد علاقے اندھیرے میں ڈوب گئے۔

یاد رہے کہ آج صبح سے کراچی کے مختلف علاقوں میں وقفے وقفے سے ہلکی و تیز بارش کا سلسلہ جاری ہے اور شہر میں اس کی وجہ سے جگہ جگہ پانی جمع ہو گیا۔

کراچی میں مون سون اسپیل کی تین روزہ بارش کا سلسلہ جاری

شہر کے مختلف حصوں میں ہلکی بارش سے موسم خوشگوار ہو گیا تاہم مختلف علاقوں میں ہلکی بارش کے بعد سڑکوں پر پھسلن ہے جس کے باعث متعدد موٹر سائیکلوں کو حادثات بھی پیش آئے ہیں۔

محکمہ موسمیات کے مطابق آئندہ 24 گھنٹوں کے دوران مطلع ابر آلود رہنے اور وقفے وقفے سے بوندا باندی متوقع ہے۔

محکمہ موسمیات کا کہنا ہے کہ شہر کا زیادہ سے زیادہ درجۂ حرارت 33 سے 35 ڈگری سینٹی گریڈ تک بڑھنے کا امکان ہے، جنوب مغربی علاقوں سے ہلکی ہوائیں بھی چل رہی ہیں۔

محکمہ موسمیات کا کہنا ہے کہ ہلکی ہواؤں سے درمیانی شدت کی مون سون ہواؤں کا سلسلہ ملک کے شمال مشرقی علاقوں میں داخل ہو رہا ہے جبکہ اگلے ہفتے سے مون سون ہواؤں کی شدت میں اضافے کا امکان ہے۔