صوبائی وزیر سندھ برائے تعلیم سعید غنی نے کہاہے کہ کراچی کے میئر اس قومی بحران میں عوام کی دادرسی کے بجائے آنسو بہارہے ہیں۔

تفصیلات کے مطابق پاکستان  پیپلزپارٹی کراچی کے صدر اور سندھ کابینہ میں وزیر سعید غنی نے اپنے  ایک بیان میں کہا کہ کراچی تاریخی برسات کے بعد بدترین قومی بحران کا سامنا کررہا ہے مگر وفاق کہیں نظر نہیں آرہا۔

صوبائی وزیر سندھ برائے تعلیم نے کہا کہ عمران خان نے کراچی کے نام پر ووٹ مانگے اور آج اس قومی بحران میں شہرقائد کو لاوارث چھوڑ دیا جبکہ سندھ حکومت تنِ تنہا تاریخی برسات کے بعد قومی بحران کا سامنا کررہی ہے۔

سعید غنی نے بارشوں کے بعد بدترین لوڈشیڈنگ کی وجہ سے نکاسی آب میں مشکلات پر کے الیکٹرک پر بھی تنقید کرتے ہوئے کہا  کہ کے الیکٹرک والے کراچی کو لوٹ رہے ہیں، برسات کے بعد قومی بحران میں بھی ان کی کارکردگی صفر ہے۔

پاکستان  پیپلزپارٹی کراچی کے صدر اور سندھ کابینہ میں وزیر سعید غنی نے مزید کہا کہ آج اس قومی بحران میں پی پی کے عوامی نمائندوں کے علاوہ کوئی نہیں جو عوام کے درمیان موجود ہو جبکہ کراچی کے میئر  بھی اس قومی بحران میں عوام کی دادرسی کے بجائے آنسو بہارہے ہیں ۔

مزید پڑھیں

سعید غنی کی وفاق پر کڑی تنقید  

صوبائی وزیر سندھ برائے تعلیم سعید غنی نے آج پریس کانفرنس کے...

یاد رہے اس سے قبل محکمہ موسمیات نے شہر قائد میں 24 گھنٹوں کے دوران ہونے والی بارش کا ریکارڈ جاری کیا ہے۔

محکمہ موسمیات کے مطابق  سب سے زیادہ بارش گلشنِ حدید میں 105 ملی میٹر ریکارڈ کی گئی، لانڈھی میں 45 اعشاریہ 5 ملی میٹر بارش ریکارڈ کی گئی۔

شہرقائد کے انٹر نیشنل ایئرپورٹ جناح ٹرمینل پر 11اعشاریہ 4ملی میٹر، نارتھ کراچی میں 4 اعشاریہ 2، ناظم آباد میں 2، سرجانی ٹاؤن میں 2 اعشاریہ 6، یونیورسٹی روڈ پر 8 اعشاریہ 4 ملی میٹر بارش ریکارڈ کی گئی۔