پاکستان نے پاک چین وزرائے خارجہ کے تزویراتی مذاکرات کے اعلامیہ پر بھارتی بیان کو سختی سے مسترد کر دیا۔

تفصیلات کے مطابق ترجمان دفترخارجہ زاہد حفیظ چوہدری نے اپنے ایک بیان میں پاک چین وزرائے خارجہ تزویراتی مذاکرات کے اعلامیہ پر بھارتی وزارت خارجہ کے بیان کو غیر ضروری اور غیر ذمہ دارانہ قرار دے دیا۔

ترجمان دفتر خارجہ نے کہا کہ ہم بھارتی وزارت خارجہ کے بیان کو سختی سے مسترد کرتے ہیں، بھارت کے جموں و کشمیر پر دعووں کی کوئی بنیاد نہیں۔

زاہد حفیظ چوہدری نے یہ بھی کہا کہ بھارتی وزارت خارجہ کی جانب سے جموں و کشمیر کو خودساختہ اٹوٹ انگ ،لازمی جزو اور اندرونی معاملہ قرار دینا مضحکہ خیز, قانونی حقائق اور تاریخ کےبرعکس ہے۔

مزید پڑھیں

زاہد حفیظ چوہدری، ترجمان دفتر خارجہ مقرر

وزارت خارجہ کی جانب سے زاہد حفیظ چوہدری کو ترجمان دفتر خارجہ...

ترجمان دفترخارجہ کا کہنا تھا کہ بھارتی دعویٰ اقوام متحدہ کی سلامتی کونسل کی متعلقہ قراردادوں کی بھی کھلی خلاف ورزی ہے جبکہ بھارت کے جموں و کشمیر بالخصوص اپنے زیر قبضہ علاقوں پر دعووں کی کوئی بنیاد نہیں ہے۔

زاہد حفیظ چوہدری کا یہ بھی کہنا تھا کہ مقبوضہ کشمیر میں بھارتی ریاستی دہشت گردی کو جھٹلایا نہیں جاسکتا، بھارت کشمیری عوام کے بنیادی حقوق غصب کیے ہوئے ہے۔

ترجمان دفترخارجہ زاہد حفیظ چوہدری کا مزید کہنا تھا کہ بھارت اپنی بین الاقوامی ذمہ داریاں پوری کرے جب کہ جموں و کشمیر کے عوام کو سلامتی کونسل کی قراردادوں کے مطابق حق خود ارادیت دینا ہوگا۔