وزیرِ اطلاعات پنجاب فیاض الحسن چوہان کا کہنا ہے کہ بلاول اور مراد علی شاہ عثمان بزدار سے بہتر گورننس کے گُر سیکھیں جو بات بات پر تنقید کرتے ہیں، لوکل گورنمنٹ اور ویسٹ مینجمنٹ کمپنیوں سمیت تمام متعلقہ اداروں نے عید کے دنوں میں بہترین کام کیا ہے۔

فیاض الحسن چوہان نےکہاکہ سماجی رابطوں کی ویب سائٹ پر متعارف کرائے گئےان کے ہیش ٹیگ “صاف پنجاب، شکریہ بزدار” کی دھوم رہی ہے اور یہ ہیش ٹیگ ٹاپ ٹرینڈ بن گیا ہے۔

فیاض الحسن چوہان نے کہا کہ ماضی میں شوباز شریف ذاتی تشہیر کے چکر میں اداروں کو کمزور کرتے رہے۔ اسی طرح سندھ حکومت بھی اپنی ناکامیاں چھپانے کے لیے بزدار حکومت کے خلاف بھونڈے پراپیگنڈے کرتی رہی۔

انہوں نے کہا کہ عید کے دنوں میں بارش کے پانی کی مسلسل نکاسی کے باعث شہری علاقوں میں آمد و رفت میں رکاوٹ نہیں آئی، سب نے دیکھا کہ اداروں نے اپنا کام کسی سیاسی شعبدے بازی اور مداخلت کے بغیربہترین کام کیا۔