این سی او سی کی جانب سے سیاحتی مقامات پر ایس او پیز، صحت کے رہنما خطوط پر عملدرآمد کو یقینی بنانے اور بیشتر مقامات پر ٹیسٹنگ پر زور دیا گیا ہے۔

تفصیلات کے مطابق وفاقی وزیر برائے منصوبہ بندی، ترقیات اور خصوصی اقدامات اسد عمر کی زیرصدارت این سی او سی کے اجلاس میں مختلف سیاحتی مقامات اور محرم الحرام کے حوالے سے انتظامیہ کے اقدامات اور ایس او پیز پر عملدرآمد کے بارے میں تبادلہ خیال کیا گیا۔

نیشنل کمانڈ اینڈ آپریشن سنٹر (این سی او سی) نے سیاحتی شعبے کے دوبارہ آغاز کے بعد بدھ کے روز ملک کے سیاحتی مقامات کے بارے میں کورونا سے متعلق رائج ایس او پیز اور صحت کے رہنما خطوط پر عملدرآمد کا مشاہدہ کیا اور وائرس کی نشاندہی کے لئے مختلف مخصوص مقامات پر ٹیسٹنگ کے حوالے سے کیے گئے اقدامات کی حوصلہ افزائی کی ہے۔

فورم کو بتایا گیا ہے کہ سیاحتی مقامات پر ایس او پیز اور سماجی فاصلوں کی خلاف ورزیوں کا مشاہدہ  ہوا ہے جس سے ملک میں وبا کے دوبارہ پھیلاؤ کا خطرہ درپیش ہے۔

اجلاس کو بتایا گیا ہے کہ اس وبائی مرض کو روکنے کے لئے ماسک پہننا، ہاتھ دھونے اور سماجی فاصلے ضروری ہیں، محرم مجالسوں کے دوران ایس او پیز پر عمل پیرا ہونے میں بہتری آئی ہے جسے عوامی تعاون کے ساتھ مزید بہتر بنانے کی ضرورت ہے۔

فورم نے متعلقہ حکام کو ہدایت کی کہ وہ ان علاقوں جہاں پر اس وائرس کے پھیلنے کا خطرہ ہے وہاں پر اس وائرس کے حوالے سے رائج ایس او پیز کی تعمیل کے لئے انتظامی اقدامات کو تیز کریں۔