شہر قائد میں مون سون کا سیزن تباہی مچا رہا ہے تاہم سیلاب سے متاثرہ علاقوں میں پاک فوج کی امدادی کاروائیاں جاری ہیں۔

پاک فوج کےشعبہ تعلقات عامہ (آئی ایس پی آر) کی طرف سے جاری کردہ بیان کے مطابق کراچی کے سیلاب سے متاثرہ علاقوں میں پاک فوج کا ریلیف اینڈ ریسکیو آپریشن جاری ہیں۔

 ترجمان آئی ایس پی آر نے کہا کہ سول انتظامیہ کے ساتھ مل کر مختلف علاقوں میں 32 میڈیکل کیمپ قائم کیئے گئے ہیں جبکہ سرجانی ٹائون، قیوم آباد اور سعدی ٹائون میں تین آرمی موبائل ہسپتال قائم کیئے گئے ہیں۔

 ترجمان آئی ایس پی آر نے یہ بھی کہا کہ مشکلات میں گھرے عوام کی مدد کے لییے سول انتظامیہ کے ساتھ مل کر 56 ریلیف کیمپ قائم ہیں جبکہ 9 مقامات سے پانی نکالنے کا کام مکمل کیا گیا۔

 ترجمان آئی ایس پی آر کا کہنا ہےکہ عوام کو محفوظ مقامات تک منتقل کرنے کا عمل بھی جاری ہے جبکہ متاثرین کو پکا ہوا کھانا بھی فراہم کیا جا رہا ہے۔

ترجمان آئی ایس پی آر کا یہ بھی کہنا ہے کہ حیدر آباد کے علاقے لطیف آباد میں بھی ریلیف آپریشن جاری جبکہ دادو میں سیلاب میں پھنسے 350 افراد کو محفوظ مقامات تک منتقل کیا گیا ہے۔

ترجمان آئی ایس پی آر کا مزید کہنا ہے کہ بدین میں 5 دیہات سیلاب کی زد میں آئے ہیں، جہاں پاک بحریہ نے میڈیکل کیمپ قائم کیا ہے۔

مزید پڑھیں

کراچی میں سیلابی صورتحال، آرمی چیف کی کور کمانڈرکراچی کو امداد کی ہدایت

آرمی چیف جنرل قمر جاوید باجوہ کا لوگوں کی مدد کے لیے...

یاد رہے کہ کراچی میں موسلادھار بارش کے بعد فوج اور رینجرز کی 70 ٹیمیں امدادی کاموں میں مصروف ہیں۔

ترجمان آئی ایس پی آر کا کہنا تھا کہ ایم نائن کو سیلاب سے بچانے کے لیئے آرمی انجینرز نے فوری طور پر دو سو میٹر لمبا اور چار فٹ اونچا بند بنایا جبکہ قائد آباد کے عوام کو آرمی انجینرز کی کشتیوں کے ذریعے محفوظ مقامات تک پہنچایا جا رہا ہے۔

واضح رہے کہ صوبہ سندھ میں مون سون بارشوں نے تباہی مچادی ہے جب کہ کراچی میں مسلسل بارش کے باعث کئی نشیبی علاقے زیر آب آگئے ہیں۔