صدر مملکت ڈاکٹر عارف علوی نے ترکمانستان کے صدر قربان علی محمدوف سے ٹیلی فون رابطہ  کیا ، جس میں دونوں رہنماﺅں نے مختلف شعبوں میں موجودہ دوطرفہ تعلقات پر اطمینان کا اظہار کرتے ہوئے تجارت، معیشت اور توانائی کے شعبوں میں تعاون کو مزید فروغ دینے کی ضرورت پر زور دیا۔

اس موقع پر دونوں رہنماﺅں نے پاک ترکمانستان دوطرفہ تعلقات، تاپی گیس پائپ لائن منصوبے اور ٹی اے پی پاور ٹرانسمیشن لائنز کے بارے میں تبادلہ خیال کیا جبکہ دونوں صدور نے افغان امن عمل پر تبادلہ خیال کیا اور دیرینہ تنازعہ کے پرامن حل کی ضرورت پر زور دیا۔

ٹیلی فون رابطے میں صدر مملکت ڈاکٹر عارف علوی نے گوادر اور ترکمان باشی کی بندرگاہوں کے مابین تعلقات پر مفاہمت کی یادداشت کو جلد حتمی شکل دینے کی تجویز دی جبکہ ترکمانستان کے صدر کو کورونا وبا کے دوران پاکستان کی جانب سے اختیار کی گئی سمارٹ لاک ڈاﺅن کی پالیسی سے آگاہ کیا ۔

صدر مملکت ڈاکٹر عارف علوی نے تاپی گیس پائپ لائن منصوبے کی جلد تکمیل پر زور دیتے ہوئے کہا کہ اس منصوبے سے دونوں ممالک کے مابین دوطرفہ تعلقات کو مزید مستحکم کرنے میں مدد ملے گی۔

صدر مملکت نے کہا کہ یہ منصوبہ چین پاکستان اقتصادی راہداری علاقائی روابط کو فروغ دے گی جبکہ  خطہ کے ممالک بالخصوص افغانستان اور وسطی ایشیائی ممالک کو شاہراہوں اور ریلوے انفراسٹرکچر سے زبردست فائدہ ہو گا۔

ڈاکٹر عارف علوی نے گوادر بندرگاہ کی اہمیت اجاگر کرتے ہوئے کہا کہ اس سے ترکمانستان کو مختصر ترین راستہ تجارتی راستہ فراہم ہو گا۔

صدر مملکت نے بھارتی زیر تسلط جموں و کشمیر میں انسانی حقوق کی سنگین پامالیوں کو اجاگر کرتے ہوئے کہا کہ عالمی برادری کو ان انسانی حقوق کی سنگین پامالیوں کا نوٹس لینا چاہئے۔

رابطے میں ترکمانستان کے صدر نے دوطرفہ تجارت، مواصلات، زراعت، صنعت، ٹرانسپورٹ اور سائنس اور ٹیکنالوجی کے شعبوں میں تعاون کے فروغ کیلئے مشترکہ ورکنگ گروپس کے اجلاس آن لائن بلانے کی تجویز دی۔

ترکمانستان کے صدر نے ڈاکٹر عارف علوی کو 2021ءمیں اشک آباد میں منعقد ہونے والی بین الاقوامی کانفرنس میں شرکت کی دعوت دی۔

صدر مملکت ڈاکٹر عارف علوی نے اپنے ترکمانستان کے ہم منصب کو ٹیلی فون کرنے پر شکریہ ادا کرتے ہوئے کہا کہ اعلیٰ سطح کے اس طرح کے روابط سے دونوں برادر ممالک کے درمیان تعلقات مستحکم ہوں گے۔