گلوکار  علی ظفر نے پاکستان کے معروف نعت خواں جنید جمشید کی 56 ویں سالگرہ پر منفرد انداز میں خراج عقیدت پیش کیا ہے۔

تفصیلات کے مطابق علی ظفر نے ٹویٹر پر ایک ویڈیو شیئر کی جس میں وہ مشہور ’اعتبار‘ گیت گاتے نظر آرہے ہیں جب کہ ویڈیو کے ساتھ انہوں نے سالگرہ کی مبارک باد دیتے ہوئے کہا کہ آپ ہمیشہ ہمارے دلوں پر حکمرانی کرتے رہیں گے، ساتھ ہی یہ بھی کہا کہ اللہ پاک جنید جمشید کو جوار رحمت میں جگہ عطا فرمائے۔

Happy 56th birthday dear Junaid Jamshed. You will always rule our hearts. Rest in peace. Sharing my little tribute again. Aitebar| Vital Signs| Cover https://t.co/SZF0x7Nx1X #JunaidJamshed

— Ali Zafar (@AliZafarsays) September 3, 2020

 3 ستمبر  1964ء کو کراچی میں پیدا ہونے والے جنید جمشید نے زندگی کے آخری ایام میں دین کی روشنی کو دوسروں تک پہنچانے کو اپنا مقصد بنائے رکھا، ستارہ امتیاز پانے والے جنید جمشید کی آج 56 ویں سالگرہ منائی جا رہی ہے۔

ماضی کے معروف میوزیکل بینڈ وائٹل سائن کے روح رواں گلوکار مرحوم جنید جمشید ابتدا میں موسیقی کی وجہ سے کافی مقبول رہے لیکن دل دل پاکستان گانا اُن کی اصل پہچان بنا۔

یاد رہے کہ دسمبر 2016ء میں جنید جمشید چترال سے اسلام آباد جانے والے بدقسمت طیارے میں سوار تھے جو حویلیاں کے قریب حادثے کا شکار ہوگیا تھا۔ حادثے کے نتیجے میں جنید جمشید اور ان کی اہلیہ نیہا سمیت طیارے میں سوار تمام 48 مسافر جاں بحق ہوگئے تھے۔

واضح رہے کہ  گلوکاری کی دنیا کو مکمل طور پر خیرباد کہنے والے جنید جمشید نے اپنی زندگی میں کئی نعتیں بھی پڑھیں۔