وزیراعظم آزادکشمیر راجہ فاروق حیدر خان نے کہا ہے کہ کوئی بھی فوج عوامی تعاون کے بغیر لڑائی نہیں لڑسکتی۔

تفصیلات کے مطابق وزیراعظم آزادکشمیر راجہ فاروق حیدر خان نے لائن آف کنٹرول پر جلسہ عام سے خطاب کیا جبکہ عوام نے وزیراعظم آزادکشمیر کو اپنے درمیاں پاکر خوشی کا اظہار شاندار استقبال کیا۔

اس موقع پر وزیراعظم آزادکشمیر راجہ فاروق حیدر خان نے جلسہ عام سے خطاب کرتے ہوئےکہا کہ لائن آف کنٹرول پر ہندوستانی فوج کے سامنے ڈٹے رہنے والے لوگوں کو سلام پیش کرتا ہوں۔

راجہ فاروق حیدر خان کا کہنا تھا کہ لائن آف کنٹرول پر ہندوستانی فوج کی جارحیت کا نشانہ عورتیں بچے اور بزرگ ہیں، مختلف ممالک کے سفرا اتاشیوں بین الاقوامی میڈیا کے دورہ لائن آف کنٹرول کا خیر مقدم کرتے ہیں۔

وزیراعظم آزادکشمیر کا یہ بھی کہنا تھا کہ بین الاقوامی وفد نے خود آکر دیکھا کس طرح ہندوستان کلسٹر ایمونیشن استعمال کرکہ معصوم شہریوں کی جانیں لے رہا ہےجبکہ لائن آف کنٹرول پر ہندوستانی فوج آزادکشمیر کے شہریوں پر ممنوعہ و مہلک ہتھیار استعمال کررہا ہے۔

راجہ فاروق حیدر خان نے کہا کہ مقبوضہ کشمیر میں انسانی حقوق کی خلاف ورزیوں پردہ ڈالنے کے لیے لائن آف کنٹرول پر نہتے معصوم لوگوں کو نشانہ بنا رہا ہے۔

وزیراعظم آزادکشمیر راجہ فاروق حیدر خان نے مزید کہا کہ ہندوستان چاہتا ہے لوگ لائن آف کنٹرول سے پیچھے ہٹ جائیں کشمیری دفاع وطن کے لیے پاک فوج کے ساتھ کھڑے ہیں۔