وزیراعلیٰ بلوچستان جام کمال خان نے کہا ہے کہ فٹ بال گراونڈز اور اسپورٹس کمپلیکس نوجوانوں کے لئے فائدہ مند ہوگا۔

تفصیلات کے مطابق وزیراعلیٰ بلوچستان جام کمال خان نے میڈیا سے گفتگو کرتے ہوئے کہا کہ کوئٹہ کے مختلف علاقوں میں فٹ بال گراونڈز قائم کر دئے گئے ہیں۔

وزیراعلیٰ بلوچستان نے کہا کہ شہر کے مختلف علاقے جہاں قبضہ مافیا قابض تھا ان سے زمینیں چھڑا دی گئیں جبکہ بلوچستان میں مجموعی طور پر 67 فٹ بال گراونڈز تعمیر کئے جا رہے ہیں۔

جام کمال خان نے یہ بھی کہا کہ کوئٹہ شہر میں 10 فٹ بال گراونڈز قائم کئے جا رہے ہیں، ماضی میں کوئٹہ ہمیشہ نظر انداز رہا ہے لیکن ہم ایسا ہونے نہیں دینگے۔

وزیراعلیٰ بلوچستان کا کہنا تھا کہ بلوچستان میں سڑکوں کا جال بچھانے کے ساتھ اسپورٹس، صحت، تعلیم اور امن و امان پر خصوصی توجہ دی رہی ہے۔

جام کمال خان کا یہ بھی کہنا تھا کہ شہر کی ٹریفک کے مسائل حل کرنے کے لیے اقدامات جاری ہیں، بادیبی لنک روڈ،  سریاب روڈ، سبزل روڈ اور ائیرپورٹ سمیت کئی سڑکیں لنک روڈ سے جوڑ رہے ہیں۔

وزیراعلیٰ بلوچستان جام کمال خان کا مزید کہنا تھا کہ سٹی نالے کے اوپر بھی ایکسپریس وے کی تعمیر آخری مراحل میں داخل ہو گئی ہے جبکہ اسپورٹس کمپلیکس نوجوانوں کے لئے فائدہ مند ہوگا۔