عالمی وبا کی وجہ سے تعلیمی نظام بھی بہت متاثر ہوئی لیکن سوال اب یہ ہے کہ آخر کب ملک بھر کے تعلیمی ادارے کھول دیے جائے گے۔

تفصیلات کے مطابق وفاقی وزیر تعلیم شفقت محمود نے اپنے ایک بیان میں کہا ہے کہ تعلیمی ادارے کھولنے سے متعلق فیصلہ7 ستمبر کو ہوگا، جبکہ تجویز ہے کہ کلاسز کو دو حصوں میں تقسیم کر دیا جائے۔

خیال رہے کہ عالمی وبا کے باعث ملک بھر کے تعلیمی ادارے غیر معینہ مدت کے لیے بند کر دیے گئے تھے۔

تاہم اب حکومت کورونا کا خطرہ کم ہوجانے کے بعد اسکول دوبارہ کھولنے کا سوچ رہی ہے جبکہ تاحال حتمی فیصلہ نہیں ہو سکا ہے۔

اس حوالے سے شفقت محمود کا کہنا تھا کہ اگلے ماہ 7 ستمبر کو اجلاس میں تعلیمی ادارے کھولنے یا نہ کھولنے سے متعلق حتمی فیصلہ کیا جائے گا، اجلاس میں تمام صوبوں کے وزرائے تعلیم شریک ہوں گے۔

دوسری جانب نصاب کے حوالے سے وزیر تعلیم نے انکشاف کیا ہے کہ اس حوالے سے قانون سازی ہو رہی ہے کہ ایسا نصاب متعارف کروایا جائے جو پورے ملک میں لاگو ہو۔

یاد رہے کہ ایک سے پانچویں جماعت کا نصاب بن چکا ہے، ایک سے پانچویں جماعت کے نصاب پر تمام صوبے متفق ہیں۔

واضح رہے کہ پہلی سے پانچویں جماعت کا نیا نصاب آئندہ سال اپریل سے نافذ ہو جائے گا، نیا تعلیمی نصاب سرکاری، نجی اور مدرسوں میں بھی لاگو ہوگا۔