وزیراعلیٰ بلوچستان جام کمال خان نے کہا ہے کہ ماسٹر پلاننگ سے بہتر شہری سہولتیں دستیاب ہونگی۔

تفصیلات کے مطابق وزیراعلیٰ بلوچستان جام کمال خان کی زیرصدارت اعلی سطح اجلاس ہوا، اجلاس کے دوران کوئٹہ سمیت دیگر شہروں کی ماسٹر پلاننگ کے منصوبوں کی پیشرفت کا جائزہ بھی لیا گیا۔

وزیراعلی بلوچستان نے ٹاؤن ڈویلپمنٹ اینڈ ہاؤسنگ پالیسی کی تیاری کے عمل کی جلد ازجلد تکمیل کی ہدایت دی جبکہ سیکریٹری اربن پلاننگ اینڈ ڈویلپمنٹ عبداللطیف کاکڑ  نے اجلاس شرکاء کو بریفنگ دی۔

بریفنگ میں کہا گیا کہ کوئٹہ کی ماسٹر پلاننگ کے منصوبے کی تخمینہ لاگت تین سو ملین روپے ہے جبکہ منصوبے کے لئے کنسلٹنٹ کی تعیناتی کے ٹینڈرنگ کاعمل حتمی مراحل میں ہے اور صوبے کے تیس دیگر ٹاؤنز کی ماسٹر پلاننگ کے منصوبے پر بھی عملدرآمد کیا جارہا ہے

وزیراعلی بلوچستان نے اجلاس کی صدارت کرتے ہوئے کہا کہ ماسٹر پلاننگ کا مقصد شہروں کی تعمیروترقی کو منظم خطوط پراستوار کرکے انہیں وسعت دینا ہے جبکہ ماسٹر پلاننگ سے بہتر شہری سہولتیں دستیاب ہونگی۔

جام کمال خان نے یہ بھی کہا کہ ماسٹر پلاننگ کی تکمیل کے بعد اس پر عملدرآمد کے لئے  ایکٹ کے طور پر اسمبلی سے منظور کراکے نافذ کیا جائے گا۔

 وزیراعلیٰ بلوچستان جام کمال خان نے مزید کہا کہ ایکٹ سے قانونی تحفظ مل سکے گا کوئی بھی فرد واحد یا ادارہ ماسٹر پلاننگ کی خلاف ورزی نہیں کرسکے گا۔