صدر پی ٹی آئی کراچی خرم شیر زمان نے کہا ہے کہ میڈیا ٹیم مخالفین کے خلاف ہمارا سب سے بڑا ہتھیار ہے۔

تفصیلات کے مطابق صدر پی ٹی آئی کراچی خرم شیر زمان کی میڈیا ڈپارٹمنٹ پی ٹی آئی کراچی کی ٹیم سے ملاقات ہوئی جس میں پارٹی کی میڈیا پالیسی پر تفصیلی گفتگو کی گئی۔

خرم شیر زمان نے کہا کہ پی ٹی آئی میڈیا ٹیم کے رضاکار دن رات محنت کر کے پارٹی کا موقف میڈیا تک پہنچاتے ہیں۔

صدر پی ٹی آئی کراچی خرم شیر زمان نے مزید کہا کہ میڈیا ٹیم پارٹی موقف کو مزید بہتر انداز میں میڈیا تک پہچائے جبکہ میڈیا ٹیم کی کارکردگی پارٹی قیادت کے لیے باعث فخر ہے۔

ملاقات میں میڈیا ڈپارٹمنٹ سے صدام کنبھر، عزیر صدیقی، فلک الماس جبکہ سیکریٹری اطلاعات کراچی و رکن سندھ اسمبلی جمال صدیقی اور دیگر اراکین شریک ہوئے۔

واضح رہے اس سے قبل کراچی میں پریس کانفرنس کرتے ہوئے خرم شیرزمان نے کہا تھا کہ پیپلز پارٹی نے اپنے گیارہ سالہ دور اقتدار میں سوائے کرپشن کے کچھ نہیں کیا ۔ پیپلز پارٹی روٹی کپڑا مکان کے اپنے ہی نعرے میں بری طرح ناکام ہوچکی ہے۔

پی ٹی آئی رہنما نے کہا تھا کہ اب صوبائی حکومت کی نظر کراچی پیکج پر ہے ، وفاق پورے گیارہ سو ارب اپنے ہاتھ میں ہی رکھے گی ، پیپلز پارٹی کے کرپشن کے کوئی چانسز نہیں ہیں۔

خرم شیر زمان نے کہا کہ  وفاق ساڑھے تین سو ارب جبکہ جو پیسہ بچ رہا ہے وہ حکومت سندھ کراچی پیکج کے تحت شہر پر خرچ کرے گی اور کراچی میں مرحلہ  وار ترقیاتی کاموں کا جلد آغاز ہوگا۔