وفاقی وزیر توانائی عمرایوب خان اور وزیراعظم کے معاون خصوصی برائے پٹرولیم ندیم بابر سے پٹرولیم ہاوس میں وزیراعلیٰ بلوچستان جام کمال خان کی ملاقات ہوئی ہے، جس میں فریقین نے تیل اور گیس کے شعبے سمیت توانائی میں فیڈریشن اور صوبہ کے مابین باہمی تعاون کو جاری رکھنے پر اتفاق کیا۔

 ملاقات میں پٹرولیم کے شعبہ سے متعلق امور پر تبادلہ خیال کیا اور بلوچستان میں بین الاقوامی مشترکہ منصوبوں سے متعلق جاری سرگرمیوں کا جائزہ لیا جبکہ صوبے میں معدنیات کے شعبہ کی ترقی کے لئے وفاقی اور صوبائی حکومت کے مابین تعاون پر بھی گفتگو کی۔

اس موقع پر وزیراعلیٰ بلوچستان اور وفاقی وزیر نے ملک میں قدرتی وسائل سے زیادہ سے زیادہ باہمی فائدہ اٹھانے کے لئے توانائی کے منصوبوں پر مشاورت اور تعاون بڑھانے کا عزم کا اعادہ کیا۔

وفاقی وزیر توانائی اور وزیراعظم کے معاون خصوصی برائے پٹرولیم نے وزیراعلیٰ بلوچستان جام کمال خان ٰکو بلوچستان میں تیل و گیس کی تلاش اور پیداوار کی سرگرمیوں کے ساتھ ساتھ تیل کے شعبہ سے متعلق بنیادی ڈھانچہ کے ترقیاتی منصوبوں کی صورتحال اور پیشرفت سے آگاہ کیا۔

 ملاقات میں جام کمال خان نے کہا کہ موجودہ صوبائی حکومت نے قدرتی وسائل کی ترقی کے لئے ایک جامع پالیسی تیار کی ہے اور قدرتی وسائل کی ترقی کے سالانہ ترقیاتی پروگرام میں متعدد منصوبوں کو بھی شامل کیا گیا ہے۔

 وزیراعلیٰ بلوچستان جام کمال خان نے مزید کہا کہ صوبائی حکومت نے اپنے قدرتی وسائل کے ذریعہ صوبائی معیشت کو استحکام بخشنے کےلئے ٹھوس اقدامات اٹھا رہی ہے تاکہ بلوچستان کے لوگ صوبے میں ترقیاتی اور معاشی سرگرمیوں سے فائدہ اٹھا سکیں۔

ملاقات میں حکومت بلوچستان اور پٹرولیم ڈویژن کے اعلیٰ افسران نے بھی شرکت کی۔