گگلی ماسٹر عبدالقادرکو دنیا سے رخصت ہوئے ایک برس بیت گیا  ہے۔

تفصیلات کے مطابق عبدالقادر نے دنیائے کرکٹ میں لیگ اسپن بولنگ کا فن متعارف کرایا تھا۔

جادوگر لیگ اسپنر عبد القادر نے 1977ء میں انگلینڈ کے خلاف ٹیسٹ ڈیبیو کیا اور پھر ایسی شاندار کرکٹ کھیلی کہ شہرت کی بلندیوں کو چھونے لگے۔

انہوں نے لیگ اسپن میں اس قدر مہارت حاصل کی کہ اس شعبے کو ان کے تذکرے کے بغیر نامکمل سمجھا جاتاہے۔

سوئنگ کے سلطان وسیم اکرم کا کہنا ہے کہ میں ہی نہیں پورا پاکستان قادر بھائی جیسی شخصیت کو یاد کر رہا ہے ۔

پاکستان کے سابق کرکٹ کھلاڑی وسیم اکرم  نے لیگ اسپنر عبد القادر کی پہلی برسی کے موقع پر اپنے پیغام میں کہا ہے کہ میں نے اپنے کیرئیر میں عبد القادر جیسا اسپنر نہیں دیکھا، صرف میں ہی نہیں پورا پاکستان قادر بھائی جیسی شخصیت کو یاد کر رہا ہے۔

عبدالقادر نے 67 ٹیسٹ میچوں میں 236 اور 104 ایک روزہ میچوں میں 132 وکٹیں حاصل کرنے کا اعزاز حاصل کیا۔

اپنوں میں باؤ جی کے نام سے موسوم عبدالقادر دلکش شخصیت کے مالک تھے، باؤ جی کے سب سے چھوٹے بیٹے عثمان قادر کا کہنا ہے کہ وہ والد کی خواہش کے مطابق سینے پر پاکستان کا اسٹار سجانا چاہتے ہیں۔

اس حوالے سے عبدالقادر کے بیٹے سلمان قادر کہتے ہیں کہ اپنے والد کی میراث کو آگے بڑھانا اور ان کے خواب کی تکمیل میں گراؤنڈ بنانا ان کا مشن ہے۔

یاد رہے کہ لیگ اسپنر عبدالقادر 15ستمبر 1955ء کو لاہور میں پیدا ہوئے، وہ ایک برس قبل 6 ستمبر کو حرکت قلب بند ہونے سے انتقال کر گئے تھے۔

واضح رہے کہ پاکستان کے مایہ ناز لیگ اسپنر عبدالقادر نے دنیائے کرکٹ میں لیگ اسپن بالنگ کا فن متعارف کرایا، عبدالقادر لاہور میں گزشتہ برس 6 ستمبر کو حرکت قلب بند ہونے سے انتقال کر گئے تھے۔