حکومت پنجاب نے تعلیمی ادارے اور شادی ہالز کھولنے کے حوالے سے نوٹیفیکیشن جاری کردیا۔

تفصیلات کے مطابق پنجاب میں کورونا وائرس کی وجہ سے شادی بیاہ کی بڑی تقریبات پر پابندی ختم کردی گئی ہے، محکمہ داخلہ پنجاب نے تعلیمی ادارے اور شادی ہالز کھولنے کے حوالے سے نوٹیفیکیشن جاری کردیا ۔

اپنے بیان میں سیکرٹری پرائمری اینڈ سیکنڈری ہیلتھ کیئر کیپٹن (ر)محمد عثمان نے کہا کہ موجودہ صورت حال کے پیش نظر تعلیمی ادارے اور شادی ہالوں کو کھولنے کا فیصلہ کیا گیا ہے ، شادی ہالوں میں کل گنجائش کا50فیصد لوگوں کوتقریب میں شامل ہونے کی اجازت دی جائے گی۔

سیکرٹری پرائمری اینڈ سیکنڈری ہیلتھ کیئر کا کہنا تھا کہ کورونا وائرس سے بچاؤ کے حوالے سے تمام احتیاطی تدابیر جگہ جگہ آویزاں کی جائے جبکہ ہاتھ نہ ملانے،بغل گیرنہ ہونے،موبائل فون اور دوسری ڈیوائسز شیئر نہ کرنے کے پوسٹر بھی نمایاں جگہوں پر چسپاں کیے جائے۔

کیپٹن (ر)محمد عثمان کا یہ بھی کہنا تھا کہ استاتذہ تعلیمی اداروں میں آنے والے بچوں کوایس او پیز پرلازمی عمل کروائیں گے جبکہ فیس ماسک،ہینڈ سینیٹائزر اور گلوز کا استعمال لازمی کیا جائے گا۔

سیکرٹری پرائمری اینڈ سیکنڈری ہیلتھ کیئر کیپٹن (ر)محمد عثمان کا مزید کہنا تھا کہ یاد رکھیئے احتیاط کر کے ہی ہم زندگی کی تمام سرگرمیاں بحال کر سکتے ہیں، کورونا وائرس ابھی ختم نہیں ہوا لیکن ہم احتیاطی تدابیر پر عمل کر کے اس سے نجات حاصل کر سکتے ہیں۔