وزیرخارجہ مخدوم شاہ محمود قریشی نے کہا ہے کہ قوم کی سماجی ومعاشی ترقی میں پاکستان میں خواتین یکساں طور پر شراکت دارہیں۔

تفصیلات کے مطابق وزیرخارجہ مخدوم شاہ محمود قریشی نے خواتین سے متعلق عالمی کانفرنس کی پچیسویں سالگرہ پر اعلی سطحی اجلاس سے خطاب کرتے ہوئے خواتین کو بااختیار بنانے کے عزم کا اعادہ کیا جبکہ خواتین کو حقوق کی مکمل فراہمی کے مقصد کے حصول کے لئے پاکستان کی بھرپور حمایت کا اظہار کیا ہے

وزیر خارجہ نے ان مطلوبہ مقاصد کو پورا کرنے کے لئے اور بھی زیادہ اقدامات اور کاوشیں کرنے کی ضرورت پر زور دیا اور پچیس سال قبل طے ہونے والے کلیدی اہداف کے حصول میں پاکستان کے عزم کا اعادہ کیا۔

وزیرخارجہ نے کہا کہ موجودہ حکومت تمام شعبوں میں خواتین کی شرکت اور ترقی کی بھرپورحوصلہ افزائی کررہی ہے۔

شاہ محمود قریشی نے یہ بھی کہا کہ ہماری قومی ترقی کا رُخ صنفی احساس پر مبنی ہے جبکہ احساس کے عنوان سے ہمارے غربت کے خاتمے کے لئے نمایاں پروگرام میں خواتین کو غربت سے نکالنے کے اقدامات کئے گئے۔

وزیرخارجہ کا کہنا تھا کہ خواتین کے حقوق کا تحفظ اور فروغ پاکستان کو ایک اسلامی فلاحی ریاست بنانے کے وژن میں مرکزی اہمیت رکھتا ہے جس کی بنیاد ”ریاست مدینہ“ کی مثال پر استوار ہے۔

 شاہ محمود قریشی کا یہ بھی کہنا تھا کہ قانون سازی، انتظامی اور پالیسی کی سطح پرخواتین کی تعداد میں بتدریج اضافہ ہورہا ہےجبکہ انسانی حقوق کا عالمگیر اعلامیہ مرتب کرتے ہوئے ہماری معزز مندوب بیگم شائستہ اکرام اللہ نے آرٹیکل سولہ کی شمولیت میں فعال کردار ادا کیا تھا۔

وزیرخارجہ مخدوم شاہ محمود قریشی کا مزید کہنا تھا کہ غیرملکی قبضوں کے شکار خطوں میں خواتین کو سزا اور غلام بنائے رکھنے کے ہتھیار کے طورپر استعمال کیا جارہا ہے۔