محکمہ داخلہ سندھ نے چہلم کے جلوسوں سے متعلق نیا حکم نامہ جاری کردیا۔

تفصیلات کے مطابق چہلم جلوس میں نت نئی سرگرمیاں کرنے کی اطلاع ہے، محکمہ داخلہ سندھ نے جلوسوں سے متعلق نیا حکم نامہ جاری کردیا۔

محکمہ داخلہ سندھ نے صوبے کے ڈویزنل کمشنرز اور ڈی آئی جیز کو خط لکھ کر حکم دے دیا۔

محکمہ داخلہ کو یوم عاشور پر پالیسی کی خلاف ورزی کرنے کی رپورٹس موصول ہوئی تھیں جس کی بنا پر نیا حکم نامہ جاری کیا گیا۔

محکمہ داخلہ سندھ کی جانب سے جاری حکم نامہ میں کہا گیا ہے کہ پہلے سے اجازت کے علاوہ چہلم کے جلوسوں  کے نئے اجازت نامے نہ جاری کیے جائے۔

حکم نامہ میں مزید کہا گیا ہے کہ جلوس میں محکمہ داخلہ کی پالیسی کے مطابق سرگرمیوں کی اجازت ہوگی۔

یاد رہے اس سے قبل کراچی ٹریفک پولیس نے چہلم امام حسین  کے جلوس سے متعلق روٹ پلان جاری کردیا۔

ترجمان ٹریفک پولیس کے مطابق 20 صفر ،8 اکتوبر کو مرکزی جلوس نشتر پارک  سے دوپہر ایک بجے برآمدہوگا، مرکزی جلوس  سے قبل صبح 9 بجے مارٹن روڈ شاہ نجف امام بارگاہ سے علم کا جلوس برآمد ہوگا۔

ترجمان کا کہنا ہے کہ علم کا جلوس نشتر پارک  پر اختتام پذیر ہوگا جہاں مرکزی مجلس منعقد ہوگی، مرکزی مجلس کے بعد جلوس برآمد ہوگا،  مرکزی جلوس روایتی راستوں سے ہوتا ہوا حسینیہ ایرانیاں امام بارگاہ کھارادر پر اختتام پذیر ہوگا۔