‫وزیراعلیٰ پنجاب سردار عثمان بزدار نے کہا ہے کہ پاک فوج پر قوم کو ناز ہے۔

تفصیلات کے مطابق وزیراعلیٰ پنجاب سردارعثمان بزدار نے کوئٹہ کے جلسے پر ردعمل دیتے ہوئے کہا کہ اپوزیشن جماعتوں نے ووٹ کو عزت دو کے نام پر آج کوئٹہ میں تماشا لگایا۔

سردارعثمان بزدار نے کہا کہ قومی اداروں کو متنازعہ بنا کر پاکستان کو کمزور کرنے کی گھناؤنی سازش کی جا رہی ہے جبکہ انتشار پھیلانے والے اداروں کو متنازعہ بنانے سے باز رہیں۔

وزیراعلیٰ پنجاب نے یہ بھی کہ پاکستان تحریک انصاف اداروں کے ساتھ کھڑی ہے،ادارے ہمارا فخر ہیں اور ہم اداروں کے خلاف ہر سازش کا ڈٹ کر مقابلہ کریں گے جبکہ اداروں کو نشانہ بنانے والے اپنے مذموم عزائم میں کامیاب نہیں ہوں گے-

سردارعثمان بزدار کا کہنا تھا کہ وزیر اعظم عمران خان نے جنوبی پنجاب کو شناخت دی ہے، الزامات لگانے والے پہلے اپنے گریبان میں جھانکیں۔

وزیراعلیٰ پنجاب نے کہا کہ عملی طور پر پیپلز پارٹی اور ن لیگ نے کوئی اقدام نہیں اٹھایا جبکہ مسلم لیگ ن اور پیپلز پارٹی نے جنوبی پنجاب کے عوام کے حقوق پر ڈاکہ ڈالا اور اپنے دور میں جنوبی پنجاب کو صوبہ بنانے کے کھوکھلے نعرے لگائے-

سردار عثمان بزدار نے یہ کہا کہ وزیر اعلی بلوچستان کے بارے میں بیان کی سخت مذمت کرتا ہوں، جام کمال قابل احترام وزیر اعلی ہیں، ایسا بیان دینے والوں کو شرم آنی چاہیے۔

وزیراعلیٰ پنجاب سردارعثمان بزدار نے مزید کہا کہ پنجاب حکومت نے بلوچستان کے طلبہ کا مسئلہ فوری حل کیا جبکہ تحریک انصاف کی حکومت نے جنوبی پنجاب سیکرٹریٹ بنایا اور اب صوبہ بھی ہم بنائیں گے اور قوم ایسے چور ٹولے کے جھانسے میں کبھی نہیں آئیں گے۔